Протокот на руска сурова нафта кон Унгарија и Словачка преку нафтоводот „Дружба“ беше прекинат во понеделникот, а унгарските власти тврдат дека причината е украински напад врз дел од енергетската мрежа, објави Ројтерс.
Украина ги засили нападите врз руската енергетска инфраструктура, клучен извор на приходи за воените напори на Кремљ, при што продажбата на нафта и гас сочинува четвртина од вкупните буџетски приходи на Русија.
Украинскиот министер за надворешни работи, Андриј Сибиха, не го потврди ниту демантираше најновиот напад, но напиша на мрежата Икс дека Унгарија „сега може да поднесува жалби“ во Москва, а не во Киев.
Прекинот на снабдувањето со нафта се случува во критичен момент
Прекинот на снабдувањето со нафта се случува во момент кога американскиот претседател Доналд Трамп треба да биде домаќин на украинскиот претседател Володимир Зеленски и европски лидери во Вашингтон подоцна во понеделникот, за да ја притисне Украина да прифати мировен договор со Русија.
За разлика од повеќето други земји од ЕУ, Унгарија ја задржа својата зависност од руската енергија од почетокот на руската инвазија врз Украина. Таа најголемиот дел од суровата нафта ја увезува преку нафтоводот „Дружба“, кој минува низ Белорусија и Украина до Унгарија и Словачка.
Протокот на нафта преку советскиот нафтовод „Дружба“ беше накратко прекинат и во март, откако Украина изведе напад на мерна станица.
Овој удар е срамен
Унгарскиот министер за надворешни работи и трговија, Петер Сијарто, напиша на социјалните мрежи дека разговарал со рускиот заменик-министер за енергетика Павел Сорокин, кој му кажал дека експерти работат на обновување на трафостаница за која тврди дека била погодена во најновиот напад, но не било јасно кога ќе продолжат испораките.
„Овој последен удар врз нашата енергетска безбедност е срамен и неприфатлив. „Уште еден обид да нè вовлечат во војна. Нема да успее. Ќе продолжиме да ги поддржуваме мировните напори со сите наши сили и да ги браниме нашите национални интереси“, напиша Сијарто. Тој не наведе кога или каде се случил нападот.
Сорокин не одговори на барањето за коментар. Руската компанија „Транснефт“, која го оперира нафтоводот во Русија, и руското министерство за енергетика, исто така, одбија веднаш да коментираат.
Според податоци на руската влада, Русија лани испорачала 4,78 милиони метрички тони, или околу 95.000 барели дневно, нафта во Унгарија преку „Дружба“.
„Русија ја почна војната, а не Украина“
Сибихa во понеделникот напиша на Икс: „Русија, а не Украина, ја започна оваа војна и одбива да ја заврши. Унгарија со години беше предупредувана дека Москва е ненадежен партнер. И покрај тоа, Унгарија направи сѐ за да ја задржи својата зависност од Русија“.
Словачкиот оператор на нафтоводот „Транспетрол“ потврди дека снабдувањето со нафта кон Словачка преку „Дружба“ било запрено.
„Нашата компанија нема повеќе информации за причината за прекинот, кој е надвор од територијата на Словачката Република. Транспортот на нафта низ словачка територија се одвива во согласност со планот за пумпање,“ соопштија од компанијата.
Украинското Министерство за одбрана и вооружените сили не одговорија веднаш на барањата за коментар.
Останува вкупното регионално снабдување со нафта
Унгарската нафтена компанија „МОЛ“ изјави дека вкупното регионално снабдување со нафта останува загарантирано и по прекинот на протокот од Русија преку „Дружба“.
„Во тек е техничко обновување, по што ќе продолжат испораките на сурова нафта. Безбедноста на снабдувањето во регионот останува загарантирана“, наведе компанијата во е-порака.
Лани Сијарто рече дека нафтоводот „Дружба“ ќе остане примарен правец за увоз на сурова нафта во Унгарија.
Прекинот на испораките во понеделникот доаѓа по привремениот прекин минатата недела, кога украинската војска на 13 август соопшти дека нејзини дронови погодиле пумпна станица во руската Брјанска област.
