Босанските и хрватските градови се борат со зимската бура

Обилните снежни врнежи денеска предизвикаа сериозни проблеми во сообраќајот низ Босна и Херцеговина и Хрватска. Во Сараево снегот утрово создаде застои, зголемен ризик од сообраќајни незгоди и тешкотии за движењето на возилата, соопшти зимската служба на КЈКП „РАД“.

„На терен беа ангажирани 36 возила и 90 работници, а во општина Нови Град тротоарите и локалните улици се чистеа рачно. Неозначените прекопи и препреки на патиштата дополнително го отежнуваат чистењето и предизвикуваат дефекти на возилата“, наведоа од службата.

Федералниот хидрометеоролошки завод прогнозира облачно време со снег и дожд во поголемиот дел од Босна, а дожд на југ. Температурите се движат од –2 до +4 степени, а во јужните делови до 12 степени. Метеоролозите предупредуваат дека врнежите ќе продолжат и во наредните денови, со повремени разведрувања и нови циклони, повикувајќи ги граѓаните на претпазливост.

- Advertisement -

Во Бања Лука зимските служби се активни и работат според приоритетите, со механизација ангажирана главно во повисоките делови на градот. До вечерните часови се очекува дополнителни 10 сантиметри снег, а во повисоките предели и до 20 сантиметри.

Во Хрватска снегот паѓа низ целата земја. Во Сплит и Клиса сообраќајот е отежнат, а повеќе автомобили се заглавени. Области како Лика, Горски Котар, централна и северозападна Хрватска, Славонија и Далматинска Загора се најпогодени, објави метеоролошкиот сајт Крометео.

Хрватскиот автоклуб (HAK) предупреди дека повеќето патишта се влажни или покриени со снег и се лизгави. Државниот хидрометеоролошки завод (DHMZ) измери дека најдебоката снежна покривка е на Завижан – 32 сантиметри.

Граѓаните се повикуваат на претпазливост и да ги следат состојбите на патиштата додека зимските служби продолжуваат со расчистување.