Бесплатна ИТ едукација за деца без родители

Денеска во Скопје започна со работа Детската ИТ академија Еверест (www.everest.mk) на која 30 деца од 1 до 9-то одделение добија бесплатна едукација во траење од еден месец.

Детската ИТ aкадемија Еверест e уникатна образовна програма чија главна цел е да им помогне на децата да осознаат голем број различни професии на интересен и мотивирачки начин, со истовремено усовршување на компјутерските вештини и стекнување лични вештини.

Станува збор за тематски, проектно базирани, активности во кои децата добиваат улоги од определена професија, но и предизвици од реалниот живот (прилагодени на нивната возраст) кои треба да ги решат. Решавајќи реални проблеми, освен што ќе стекнат компјутерски вештини, децата ќе се запознаат со различни професии, подобрувајќи ја самодовербата, способноста за критичко размислување и многу други лични вештини. За сето време, учениците се поттикнуваат да истражуваат, бараат, откриваат, да го развиваат своето размислување и расудување и стекнатото знаење да го користат за нивното добро и за општеството во целина.

- Advertisement -

– Академијата е фокусирана на децата, посебно на децата без родители. Во духот на мудроста на Конфучие – „на гладниот не му давај риба, научи го да лови“ – на децата без родители во соработка со Министерство за труд, демографија и млади и детскиот дом „11 Октомври“ од Скопје обезбедуваме компјутери, обуки и ментори – објаснува Александар Марјановиќ, извршен директор на Фондацијата Ѓорѓи Марјановиќ и истовремено, управител на Марјановиќ Едукација.