Поранешниот американски претседател Џо Бајден во своето прво интервју откако ја напушти Белата куќа изјави дека притисокот на неговиот наследник Доналд Трамп врз Украина да отстапи територија на Русија е форма на модерно смирување што никогаш нема да ја задоволи Москва.
Во интервју за Би-Би-Си објавено во среда, Бајден рече дека рускиот претседател Владимир Путин верува дека Украина е дел од „Мајка Русија“ и дека секој што мисли дека „ќе застане таму е едноставно наивен“.
„Едноставно не разбирам како луѓето мислат дека ако дозволиме на диктатор, насилник, да одлучи да земе значителни делови од територијата што не е негова, тоа ќе го задоволи“, рече демократот.
Тој изрази загриженост дека Европа ќе „ја изгуби довербата“ во доследноста и лидерството на Америка.
Европските лидери сега „прашуваат што да прават“ или „можат ли да се потпрат на САД“, рече 82-годишниот поранешен претседател, кого Трамп го спомена најмалку 600 пати откако ја презеде функцијата, обвинувајќи го за лошата состојба на економијата.
Во интервју за Би-Би-Си, Бајден го критикуваше начинот на комуникација на Трамп и неговите најави дека ќе ги преземе Панама и Гренланд и дека Канада мора да стане 51-ва држава на САД.
„Кој претседател некогаш зборувал така? Ние не сме такви. Ние сме за слобода, демократија, можности – не за конфискација.“
„Секоја генерација мора да се бори за зачувување на демократијата, секоја генерација“, рече Бајден.
