Авганистанец кој соработувал со ЦИА е осомничениот напаѓач кој застрела двајца војници на Националната гарда на САД пред Белата куќа во Вашингтон

Авганистанец кој соработувал со ЦИА е осомничениот напаѓач кој застрела двајца војници на Националната гарда на САД пред Белата куќа во Вашингтон. Двајцата гардисти, Сара Бекстром (20) и Ендру Волф (24), се во критична состојба во воената болница „Вашингтон меморијал“. Осомничениот, 29-годишниот Рахманула Лаканвал, е ранет и хоспитализиран по престрелката, јави Би-Би-Си.

Лаканвал влегол во САД во 2021 година како соработник на американската влада и ЦИА во Авганистан.

– По катастрофалното повлекување на Бајден, администрацијата го оправда неговиот влез поради неговата работа со партнерските сили во Кандахар – изјави директорот на ЦИА, Џон Ратклиф, за „Фокс њуз“.

- Advertisement -

Меѓутоа, според директорот на ФБИ, Каш Пател, истрагата сега се води како терористички случај. Тимовите го пребарале домот на осомничениот во државата Вашингтон и заплениле неколку електронски уреди.

– Ќе одиме каде и да нè однесат доказите – рече Пател.

Обвинителката Џанин Пиро потврди дека осомничениот се товари за напад со намера за убиство, казниво со 15 години затвор, но предупреди дека обвинението ќе биде променето во убиство од прв степен ако некој од војниците подлегне на повредите.

– Се молиме гардистите да преживеат – рече Пиро, додавајќи дека истрагата ја истакнува слабоста на имиграциските проверки. – Тоа е она што се случува кога во земјата се пуштаат луѓе без целосна проверка.

Државната обвинителка Пам Бонди најави дека ќе бара смртна казна доколку војниците не преживеат.

– Ќе направиме сè што е во наша моќ да побараме највисока можна казна против тоа чудовиште – истакна Бонди.

Американскиот претседател Доналд Трамп рече дека напаѓачот ќе „плати највисока можна цена“ и дека безбедносните протоколи ќе бидат засилени.