Американската Тик-Ток готвачка, Тинеке „Тини“ Јангер, се огласи на својот Инстаграм за да ја сподели тажната вест за губењето на едно од нејзините близначиња за време на породувањето.
24-годишната инфлуенсерка и нејзиниот сопруг Антоан Рајт Џуниор се венчаа минатата година по шест години врска, а во јули објавија дека очекуваат близнаци.
– Ова не е објавата за која некогаш помислив дека ќе ја споделам откако се родија близнаците. За жал, претходно оваа недела ја изгубивме нашата слатка ќерка Арја (бебе А). Дојдовме речиси до 36 недели бременост, бевме толку блиску до тоа да се роди целосно и да имаме две девојчиња, но имав абрупција на плацентата и ја изгубивме нашата слатка ќерка. Нејзината сестра близначка е многу добро и дише сама. Двете се толку убави и Арја секогаш ќе биде славена, нејзината сестра ќе знае дека е близначка и дека има прекрасна сестра близначка. Правам пауза, не сум сигурна колку долго, но ветувам дека ќе се вратам. Ве сакам – напиша таа во емотивната објава.
На црно-белите фотографии, Јангер и нејзиниот сопруг го држат бебето Арја покрај доктор во болница.
Абрупцијата на плацентата е „прерано одвојување на нормално позиционирана плацента од ѕидот на матката, обично по 20 недели од бременоста, според HeMED.
Терминот на раѓање на Јангер паднал непосредно пред Денот на благодарноста, голем ден за ѕвездата на онлајн готвачите.
Јангер изјави за People во октомври дека нејзините близнаци се „совршени“ и дека имала план како да се чувствува удобно на големиот празник.
– Само ќе донесам стол. Веќе имам мала кујнска столица, но Денот на благодарноста е моја работа, особено околу празниците за содржина, сите доаѓаат на мојата страница за рецепти. Ќе издржам, само ќе седнам на мојот стол бидејќи тоа ми е главна работа – рече инфлуенсерката за прилагодувањето на подготовките за Денот на благодарноста додека била бремена.
Тини има над два милиони следбеници и споделува рецепти на Тик-Ток и на Инстаграм, каде што стекна слава. Таа е и авторка на книгата за готвење „Cooking for my boyfriend“, која ја објави во 2023 година, а се појави и во втората сезона на серијалот на Гордон Ремзи „Next level Chef“.
