Ајк Тарнер Џуниор, син на музичарот Ајк Тарнер, а подоцна посвоен од Тина Тарнер, почина на 4 октомври 2025 година во Лос Анџелес на 67-годишна возраст, само еден ден по неговиот роденден. Роден во 1958 година од Ајк Тарнер постариот и Лорејн Тејлор, тој бил посвоен од Тина по нејзиниот брак со Ајк постариот во 1962 година и пораснал како дел од семејството Тарнер.
Ајк помладиот работеше во музичката индустрија како инженер за звук и изведувач и освои Греми награда во 2007 година како продуцент на блуз албумот на неговиот татко „Risin’ With the Blues“. Во последниве години, тој се соочувал со сериозни здравствени проблеми, вклучувајќи срцеви заболувања и мозочен удар во септември 2025 година, а на крајот починал од затајување на бубрезите.
Неговата смрт ја потврди на социјалните мрежи неговата јатрва Афида Тарнер, а братучетка му Жаклин Булок за TMZ изјавила дека Тарнер помладиот починал во болница во Лос Анџелес.
Тарнер помладиот бил посвоен од Тина Тарнер заедно со брат му Мајкл Тарнер. Тој брзо ги следел стапките на своите родители музичари, а Булок изјавила дека „од рана возраст, неговите таленти биле очигледни бидејќи немало инструмент на кој не сакал да свири.
– Иако тој ги претпочиташе тапаните уште на почетокот, мојата тетка и неговата мајка, Тина Тарнер, инсистираше да ги расклопува тапаните по секоја проба. Тоа го наведе повеќе да ги засака клавијатурите. На крај, Џуниор помогна во управувањето со Bolic Sound Studios, студиото за снимање што го основа неговиот татко, Ајк Тарнер.
Во интервју за „Дејли меил“ во 2018 година, Тарнер Џуниор забележал дека бил одгледан претежно од домаќинки, бидејќи неговите родители биле отсутни 11 месеци во годината.
– Татко ми ме извади од училиште на 13 години. На крајот го водев неговото студио за снимање, плус одев на турнеја со нив. Заработуваа многу пари на турнеи, а татко ми ме тераше да ги бројам додека рацете ми не ми станеа сиви.
Иако признал дека во голема мера бил отуѓен од својата мајка пред нејзината смрт во 2023 година и насилството со кое се соочувал од рацете на својот татко додека растел, музичарот рекол дека се обидувал да ја „направи вистинската работа со семејното име“ преку својот трибјут бенд „The Love Thang“. Ајк помладиот бил уапсен за поседување крек кокаин и фалсификување докази во јуни 2023 година.
Поради неговиот судир со законот, музичарот бил зад решетки кога почина Тина, на 83-годишна возраст.
Ајк постариот почина од предозирање во декември 2007 година по децениска борба со зависноста од кокаин. Имаше 76 години.
Ајк помладиот беше едно од четирите деца поврзани со култната врска на Тина и Ајк. Тој во голема мера се држел подалеку од центарот на вниманието во последните години, но останал поврзан со наследството на двајцата негови родители.
