Земјотресот со интензитет од 7,7 степени според Рихтеровата скала што вчера го погоди Мјанмар ослободи енергија еднаква на 334 атомски бомби, изјави геологот Џес Феникс за Си-ен-ен.
Таа додаде дека последователните потреси би можеле да траат со месеци, бидејќи индиската тектонска плоча продолжува да се спушта под евроазиската плоча во регионот на Мјанмар.
Мјанмар вчера беше погоден од многу силен земјотрес со интензитет 7,7 степени, со епицентар во близина на градот Мандалај, на длабочина од околу 20 километри. Големиот земјотрес беше почувствуван и во Тајланд и во други азиски земји. Неколку минути подоцна уследи втор земјотрес со интензитет од 6,4 степени.
Земјотресот урна и зграда во градба во главниот град Тајланд, при што загинаа 6 , а 50 лица сè уште се под урнатините на зградата, додека околу сто луѓе се водат како исчезнати.
Претходно, државните медиуми во Мјанмар јавија дека бројот на загинати се искачи на 1.002. Повредени се 2.376 луѓе, а 30 се водат како исчезнати.
„Оштетени се инфраструктурни објекти како патишта, мостови и згради, што резултираше со цивилни жртви и повредени. Во тек се операции за пребарување и спасување во погодените области“, се наведува во соопштението на хунтата.
Водачот на хунтата Мин Аунг Хлаинг прогласи вонредна состојба и нареди итни спасувачки напори во погодените области. Вчера тој ја покани „која било земја“ да обезбеди помош и донации.
Мјанмар е земја што е разурната од граѓанската војна, по воениот удар во 2021 година, кога беше соборена избраната цивилна влада.
Кинески спасувачки тим денеска пристигна во Мјанмар. Русија, Индија, Малезија и Сингапур испратија авиони со хуманитарна помош и спасувачки екипи.
Јужна Кореја најави дека ќе обезбеди почетна хуманитарна помош од 2 милиони долари за Мјанмар преку меѓународни организации.
Блокот на земји од Југоисточна Азија, АСЕАН денеска соопшти дека ја препознава итната потреба од хуманитарна помош за Мјанмар по големиот земјотрес и е подготвен да ги поддржи напорите за закрепнување.
И САД, и покрај тензичните односи со хунтата во Мјанмар, најавија дека ќе пружат одредена помош.
