Куполата, поставена над уништениот реактор во Чернобил, беше оштетена во ноќен напад на руски дрон. Според украинските власти, во текот на ноќта, руско беспилотно летало паднало во куполата која била изградена за да го заштити светот од радијација, објави Си-Ен-Ен.
Според претседателот на Украина, Володимир Зеленски, овој напад претставува сериозна ескалација на војната и значителен ризик за глобалната безбедност.
„Овој штит го изгради Украина заедно со другите земји од Европа и од светот, заедно со Америка – со сите оние кои се посветени на вистинската безбедност на човештвото. Единствената земја во светот, која напаѓа такви локации, окупира нуклеарни централи и води војна без никакво внимание на последиците, е денешна Русија“, рече Зеленски.
Според украинските власти, нападот предизвикал значителна штета на засолништето, но прелиминарните проценки покажуваат дека нивото на радијација останува стабилно. Службите за итни случаи бргу го изгаснаа пожарот што избувна по ударот, а нивото на радијација континуирано се следи за да се спречат понатамошни опасности.
Зеленски го осуди продолжувањето на руската агресија, нагласувајќи дека таквите напади се директна закана за меѓународната безбедност.
– Секоја вечер Русија извршува слични напади врз украинската инфраструктура и градови. Русија продолжува да ја шири својата војска и не покажува промени во својата луда, антихумана реторика. Тоа значи дека Путин дефинитивно не се подготвува за преговори – тој се подготвува да продолжи да го мами светот – рече претседателот на Украина.
Нападот во Чернобил дополнително ја нагласува зголемената закана од руските воени операции, особено кога тие се насочени кон критична инфраструктура со потенцијални глобални последици. Украина постојано повикува на зголемен притисок врз Русија, барајќи од меѓународните сојузници да преземат порешителни мерки за да ја повикаат Москва одговорна за нејзините постапки.
– Светот не смее да го игнорира ова, мора да има унифициран притисок од сите кои го ценат животот – притисок врз агресорот. Русија мора да биде одговорна за своите постапки – рече Зеленски.
Да потсетиме, на 26 април 1986 година во Чернобил се случи најголемата нуклеарна катастрофа во историјата кога реакторот број 4 експлодираше во нуклеарната централа „Владимир Илич Ленин“ во тогашниот Советски Сојуз (денешна Украина).
