Украинскиот претседател Володимир Зеленски ги негираше извештаите на „Фајненшл тајмс“ дека планира да одржи претседателски избори во Украина на четвртата годишнина од почетокот на војната.
Откако британскиот „Фајненшл тајмс“ објави во среда дека се очекува украинскиот претседател Володимир Зеленски да објави план за одржување претседателски избори и референдум за можен мировен договор со Русија на 24 февруари, на четвртата годишнина од почетокот на руската инвазија на Украина, Зеленски ги негираше овие извештаи.
Како што рече, Киев ќе почне да размислува за распишување избори дури кога ќе ги добие сите соодветни безбедносни гаранции за да ја заврши војната.
„Би сакал да нагласам дека 24 февруари е многу посебен датум. Дури и да имало намера да се распишат избори, мислам дека би било неразумно да се објават на годишнината од војната. Ова е сериозен датум. Многу луѓе кои ја бранеа нашата земја платија за тоа со своите животи. Затоа никогаш не би го направил тоа на овој датум“, ја цитираше изјавата на Зеленски американската телевизија Си-Би-Ес.
Сепак, Зеленски рече дека самиот дознал за распишувањето избори на годишнината од почетокот на војната додека го читал „Фајненшл тајмс“.
„Што се однесува до објавувањето на изборите воопшто, ќе повторам: безбедноста прво, потоа политиката. Можеме да се движиме кон изборите кога ќе бидат воспоставени сите соодветни безбедносни гаранции. Прашањето за изборите го покренаа разни партнери. Самата Украина никогаш не го покрена ова прашање. Но, секако, ние сме подготвени за изборите. Многу е едноставно: да се воспостави прекин на огнот – и изборите ќе се одржат. Значи, тоа е прашање на безбедност“, напиша Украинецот на мрежата X.
Во меѓувреме, меѓусебното гранатирање меѓу Русија и Украина продолжува. Руската војска изврши нови големи напади врз цели во Украина ноќе. Неколку лица беа повредени во нападите, а целта беше енергетската инфраструктура, според украинските власти. Околу 2.600 станбени згради во Киев се без греење како резултат на нападите.
