За училиштата во кои недостигаат учебници затоа што не ги пријавиле навреме потребните тиражи, МОН ќе им ги обезбеди во ПДФ-формати што ќе бидат ставени на веб-страницата на Педагошката служба

За училиштата во кои недостигаат учебници затоа што не ги пријавиле навреме потребните тиражи, МОН ќе им ги обезбеди во ПДФ-формати што ќе бидат ставени на веб-страницата на Педагошката служба, информираше денеска министерката за образование и наука Весна Јаневска.

Таа рече дека МОН тоа го побарало од издавачките куќи, кои ги доставуваат учебниците во ПДФ-формат и Министертсвото веќе ги поставува на веб-страницата на Педагошката служба.

Монистерката нагласи дека во училиштата се испорачани онолку учебници колку што пријавиле самите училишта.

- Advertisement -

– Учебници има, сè што побарале училиштата, сè е испорачано. На Министерството му е сосема сеедно дали ќе отпечати милион или милион и 200.000 учебници, затоа што имаме рамковна спогодба за печатење. Значи, тоа што е побарано е испорачано. Уште еднаш повторувам – до последен учебник кој е побаран од Министерството е обезбеден. Оттука, не прифаќам дека може да се рече дека учебници нема. Дали се во подобра или полоша состојба, тоа зависело од комисијата што ги примала, од директорите… Сметам дека ова прашање треба да биде затворено и во иднина да немаме никакви вакви проблеми – рече Јаневска денеска при посетата на училиштето „Свети Наум Охридски“.

Таа додаде дека се поставени јасни правила, има јасен и прецизен закон што функционира, упатства и правилник за работа кои „од следната година ќе мора да се почитуваат до последен детаљ“.

– Диструбицијата на учебниците е завршена, остануваат два учебника за први клас гимназија од кои еден е спорен, а еден е во процедура. Тие ќе бидат дистрибуирани тогаш кога ќе се реши ова. Сите други учебници се дистрибуирани – додаде Јаневска.