Пукна гасовод во Малезија, предизвика голем пожар кој зафати неколку згради Протекување на гасовод денеска предизвика голем пожар во предградие на Куала Лумпур, главниот град на Малезија, поради што беа евакуирани околните згради.
Пожар во близина на бензински пумпи во централната држава Селангор е видлив од неколку километри.
Пожарникарите во сојузната држава Селангор соопштија дека истекувањето на гасоводот се проширило на околу 500 метри и дека пожарната колона е многу висока.
Седум лица се повредени кога пожарот зафатил повеќе згради, а бројни жители биле евакуирани.
Пожарот и последиците од истекувањето на гас ја зафатија и инфраструктурата на јавното нафтено претпријатие „Петронас“, кое соопшти дека е прекинато снабдувањето со гас на инсталацијата.
Петронас соопшти дека избувнал пожар на еден од нејзините гасоводи во 8:10 часот по локално време.
Три бензински пумпи во близина на местото на пожарот не беа погодени, но беа привремено затворени како мерка на претпазливост, рече Петронас, додавајќи дека истрагата се уште е во тек.
Од Единицата за управување со катастрофи во Селангор соопштија дека пожарот се проширил на неколку куќи во блиското село, дека неколку лица се здобиле со изгореници и ќе бидат пренесени во болница и дека се уште се проценува целосниот обем на штетата.
На местото на пожарот се испратени десетици пожарникари. Главниот министер на Селангор, Амирудин Шари, рече дека пожарникарската служба како мерка на претпазливост брзо ги евакуирала жителите на околните куќи и дека тие привремено ќе бидат сместени во блиската џамија додека ситуацијата не биде под контрола.
