Во Хирошима, западниот дел на Јапонија, денес беше одбележана 80-годишнината од фрлањето на првата атомска бомба врз градот – најсмртоносниот напад со нуклеарно оружје во историјата. Градот ја започна комеморацијата точно во 8:15 часот наутро по локално време – моментот кога бомбата експлодирала на 6 август 1945 година.
Со минута молчење, положување на цвеќе и обраќања од високи официјални претставници, се оддаде почит на 140.000 луѓе кои загинаа поради разорната експлозија. Само три дена подоцна, на 9 август, втората атомска бомба беше фрлена врз Нагасаки, со што загинаа уште 70.000 луѓе. Јапонија капитулираше на 15 август, што значеше и крај на Втората светска војна.
Овие бомбардирања, кои ја принудија Јапонија да се откаже од натамошниот отпор, остануваат единствените случаи во историјата кога нуклеарно оружје било употребено во војна.
„Ни истекува времето“
Со оглед на тоа што просечната возраст на преживеаните од бомбардирањето (познати како „хибакуша“) сега надминува 86 години, годинашната церемонија се смета за едно од последните големи собирања на сведоците на трагедијата.
„Ни истекува времето и се соочуваме со поголема нуклеарна закана од кога било“, порача јапонската организација на преживеани Нихон Хиданкјо, која минатата година ја доби Нобеловата награда за мир за нејзината посветеност на укинување на нуклеарното оружје. Од таму додаваат: „Нашиот најголем предизвик сега е да ги промениме државите со нуклеарно оружје кои реагираат на нас со рамнодушност“.
На церемониите во Хирошима присуствуваа претставници од над 100 земји, меѓу кои и градоначалникот Казуми Мацуи и јапонскиот премиер Шигеру Ишиба. Тие положија венци и се обратија пред споменикот за жртвите во Меморијалниот парк на мирот.
Покрај политичарите, семејствата и преживеаните од бомбардирањето започнаа да доаѓаат уште од раните утрински часови за да запалат свеќи и да се поклонат пред сенките на најмрачниот ден во историјата на нивниот град.
