Владеачкото мнозинство составено од ВМРО-ДПМНЕ, Вреди и ЗНАМ поднесе интерпелација за работата на 5-те члена на Судскиот совет кои се избрани од Собранието

Владеачкото мнозинство составено од ВМРО-ДПМНЕ, Вреди и ЗНАМ поднесе интерпелација за работата на 5-те члена на Судскиот совет кои се избрани од Собранието, соопшти координаторот на пратеничката група на ВМРО-ДПМНЕ, Никола Мицевски.

Тој потсети дека пратеничката група на ВМРО-ДПМНЕ и коалицијата, гласаше против годишниот извештај за работата на Судскиот совет за 2023 година и тој не беше усвоен од страна на Собранието.Според Мицевски, тоа доволно говори и е една од многуте причини за интерпелацијата.

– Европската Унија и јавноста во Република Македонија постојано укажуваат на сериозни недостатоци во работата на Судскиот совет, особено во однос на независноста, транспарентноста и отчетноста. Овие забелешки се од клучно значење за процесот на реформи во правосудниот сектор и за напредокот на земјата кон членство во ЕУ. Решавањето на овие предизвици е неопходно за враќање на довербата во судскиот систем и за зацврстување на владеењето на правото. Судскиот совет е клучна институција за функционирањето на правната држава и одржувањето на владеењето на правото во Република Македонија. Затоа, секоја сенка на сомнеж во работата на неговите членови мора да биде темелно анализирана, а јавноста треба да биде уверена дека Советот работи чесно, професионално и во интерес на граѓаните – рече Мицевски.

- Advertisement -

Нашата цел, додаде тој, е да дадеме придонес и да направиме се’ што е во рамките на нашите уставни и деловнички надлежности и можности, за да овозможиме подобар, поефикасен и независен правосуден систем, кој што ќе значи и ќе донесе поголема правда за секој еден граѓанин.

– Оттука, сакаме да упатиме јасна порака дека е време да се воведе ред во руинираниот македонски правосуден систем, преку сериозни реформи и коренити промени кои ќе значат „почеток на крајот“ на сите досегашни злоупотреби, неправди, разочарувања и негативни пракси во судството во Македонија. Македонија мора конечно да добие вистински, ефикасен, независен и професионален правосуден систем, кој што ќе биде ослободен од неправди и корупција, но и од разни тесно-партиски, политички, криминогени, семејни и лични спреги и интереси кои го срозија и уништија правосудството во Македонија, без никаква доверба од граѓаните – рече Мицевски.

Тој побара поддршка од сите опозициски партии во Парламентот, како што рече, поради комплексноста и сериозноста на процесот.

Според Мицевски, ниското ниво на кое се наоѓаат Судскиот совет и правосудниот систем е поради СДСМ и сегашната опозиција.

– Ја изгубивме довербата на граѓаните во судството. Ние како Собрание сме добиле доверба од граѓаните и оттаму го преточуваме нивниот глас и започнуваме постапка за интерпелација – рече пратеникот.

Вчера премиерот Христијан Мицкоски изрази надеж дека ако пратениците им изгласаат недоверба на членовите на Судскиот совет, тие ќе бидат доблесни и ќе се повлечат.

Пет члена на Судскиот совет се избираат од страна на Собранието, од редовите на истакнатите правници, а 8 члена се судии и нив ги избираат останатите судии на директни избори.