Вест на неделата е дека во Шведска 284 малолетни девојчиња се уапсени за убиство – Ова се Швеѓаните кои ни држат предавања за владеењето на правото

Ова се Швеѓаните кои ни држат предавања за владеењето на правото. Вест на неделата е дека во Шведска 284 малолетни девојчиња се уапсени за убиство, објави вчера на Икс унгарскиот премиер Виктор Орбан.

„Не затоа што сите тие заедно убиле едно лице, туку секое посебно. Само прочитајте за тоа. Мафијата ги користела за да ги застрела своите жртви бидејќи малолетничките не можат да бидат осудени“, додаде Орбан.

Според него, ова е начинот на кој се распаднала Шведска, а откако тоа се случува, она што останува е варварство.

- Advertisement -

„Тие се одјавија од цивилизацијата. Ова е крај на процес што започна, Господ знае кога. Фазите на тој распад ги видовме, чекор по чекор, во последните 15 години. Ова е повлекување на европската цивилизација, варварство. О, патем, ова се Швеѓаните кои ни држат предавања за владеењето на правото“, пишува Орбан.

На ова реагираше шведскиот премиер Улф Кристерсен:

„Ова се скандалозни лаги. Не е изненадувачки што доаѓаат од човекот кој го уништува владеењето на правото во сопствената земја. Орбан е очаен пред претстојните унгарски избори“, рече Кристерсен.

По неговата реакција, Орбан повторно се огласи:

„Напуштањето на традиционалните вредности, занемарувањето на здравиот разум и слабото управување доведоа до вкоренување на варварството во домот на една од најголемите европски нации. Криминалните банди користат малолетни девојчиња како инструменти за убивање.

Мисијата на владеењето на правото е да ја обезбеди безбедноста на нашите луѓе. Таму каде што малолетните девојчиња систематски се користат за убиство, владеењето на правото е мртво.

Шведска е наш пријател, а шведскиот народ е голема и благородна нација.

Загрижени сме за вас!

Бог да ја благослови Шведска!“, напиша Орбан.