Велика Британија соопшти дека ќе започне големи промени на својата политика за баратели на азил користејќи го пристапот на Данска, еден од најстрогите во Европа и широко критикуван од групите за човекови права.
Лабуристичката влада ја заострува својата политика за имиграција, особено во врска со нелегалните преминувања со мали чамци од Франција. Како дел од промените, законската обврска за обезбедување поддршка на одредени баратели на азил, вклучително и сместување и неделни надоместоци, ќе биде укината, објави Министерството за внатрешни работи.
Министерството, предводено од Шабана Махмуд, соопшти дека мерките ќе се применуваат на барателите на азил кои можат да работат, но избираат да не работат, и на оние кои го кршат законот. Во него се наведува дека поддршката финансирана од даночните обврзници ќе им даде приоритет на оние кои придонесуваат за економијата и локалните заедници.
Анкетите покажуваат дека имиграцијата е главната грижа на гласачите, дури и пред економските проблеми. Во текот на годинава околу 109.300 луѓе побарале азил во Велика Британија, што е зголемување од 17 проценти во однос на претходната година и 6 проценти над врвот од 2002 година, кога нивниот број изнедувал 103.000.
Министерството за внатрешни работи изјави дека реформите нема да бидат инспирирани само од Данска, туку и од други европски земји, каде што статусот на бегалец е привремен, поддршката е условна и се очекува интеграција.
Велика Британија моментално им дава азил на оние кои можат да докажат дека не се безбедни во својата земја, а статусот на бегалец им се доделува на оние за кои се смета дека се изложени на ризик од прогон. Статусот трае пет години, по што тие можат да аплицираат за постојан престој ако исполнуваат одредени критериуми.
Данска е позната по својата строга имиграциска политика повеќе од една деценија, за која Министерството за внатрешни работи тврди дека ги намалила барањата за азил на најниско ниво во последните 40 години и резултирала со отстранување на 95 проценти од одбиените апликанти, пренесува Н1.
