Вооружените сили на Велика Британија ќе добијат нови овластувања за соборување на сомнителни дронови над воени локации, изјави британскиот министер за одбрана Џон Хили, во услови на растечки број воздушни напади низ Европа.
Според соопштението од Министерството за одбрана, Хили ќе ги предупреди бизнис лидерите во Меншн Хаус дека Велика Британија се соочува со растечка закана од државни дронови управувани од трети земји.
„Велика Британија не е имуна на овие закани“, рече тој во извадоци објавени однапред. „Секој ден се браниме од закани што се движат од морското дно до киберпросторот.“
„Секогаш ќе правиме што е потребно за да го заштитиме британскиот народ и во моментов развиваме нови овластувања за соборување на неидентификувани дронови над воени локации на Велика Британија“, рече тој.
Министерот за одбрана планира да ги истакне руските напади врз клучната енергетска инфраструктура на Украина пред зимата, додека Полска и Естонија, исто така, регистрираа повреди на воздушниот простор што ѝ се припишуваат на Москва.
Новите мерки ќе бидат вклучени во нацрт-законот за вооружени сили на Велика Британија, кој наскоро ќе биде презентиран во парламентот.
Овој потег следи по низа чекори на Лондон насочени кон зајакнување на источниот крило на НАТО алијансата, вклучувајќи летови за надзор од страна на борбените авиони RAF Typhoon над Полска и испраќање експерти за технологија против дронови во Данска, откако таа земја исто така пријави сомнителна воздушна активност.
Во меѓувреме, Европската Унија развива план под раководство на Урсула фон дер Лајен за воспоставување таканаречен „ѕид од дронови“ за заштита на своите граници и спречување на слични упади, иако некои земји-членки изразија резерви во врска со иницијативата, според Politico.
