Со уникатни маски и сатира, Вевчани денеска пулсира во ритамот на 15-вековната традиција – Василичарскиот карневал. Овој настан, кој го надминува локалното значење, преку креативноста на учесниците пренесува силни пораки за општествените и политичките случувања, како дома така и во светот.
Дефилето започна од почетокот на селото и се движи низ главната улица, предводено од зурли и тапани. Традиционалната поворка ја сочинуваат зетот, невестата, двата ѓаволи и Глупавите Августи, а зад нив следуваат маски инспирирани од годинешните актуелности.
Вевчанци не откриваат однапред во што ќе се маскираат, но секоја година нивните креации се со остроумна сатира на политичките и општествените случувања. Овој карневал, покрај тоа што е празник за очите, е и можност за луцидна критика и духовит коментар за годината што изминала.
Инаку се верува дека преку маските, Василичарите го бркаат злото и со тоа го подготвуваат селото за Новата година според Јулијанскиот календар. Василичарското оро, кое традиционално се игра во центарот на Вевчани, испраќа порака за промена на негативните појави во општеството.
Новата година, според Јулијанскиот календар, ќе биде дочекана вечер со огномет во центарот на Вевчани, а присутните ќе ги забавуваат „Љубојна“, Наум Петрески, оркестарот „Вевчани“, како и Перо Бели и Коки Биоритам.
Градоначалникот Спасе Кочовски пред почетокот на карневалот рече дека Вевчани е спремно и покрај временските услови гостите да доаѓаат, а Општината направи максимални напори за чистење на пристапните патишта и улици.
– Одамна не сме имале снежна атмосфера во Вевчани за Вечванскиот карневал. Условите се можеби по екстремни, но убаво е да се биде овие два дена во Вевчани. Општина Вевчани во соработка со јавното комунално претпријатие „Еремија“ 24 часа е на терен. Ги чистиме и регионалните патишта што не поврзуваат со Струга и Дебар за гостите да можат полесно да пристигнат – изјави Кочовски.
За содржината на маските, тој вели дека никој не ја знае освен василичарите.
– Никогаш, никој не ги знае маските, освен оние што се маскираат. Мојата помала ќерка ќе се маскира, но јас не знам во што, ќе видам сега на дефилето каква маска има. Ниту најблиските роднини не ги знаат маските. Во тоа е и убавината на Вевчанскиот карневал. Овие два дена атмосферата ќе биде како и секоја година. Очекувам се да биде во најдобар ред – додаде Кочовски.
Инаку карневалот на Вевчани останува уникатен културен феномен кој го спојува минатото со современоста, зачувувајќи ја суштината на традицијата додека ја пренесува својата силна порака.
