Утре се враќаат Македонците кои се во Кувајт, Бахреин и Саудиска Арабија

Топ Вести - Слушај сега

Македонските државјани кои се наоѓаат во Саудиска Арабија, Кувајт и Бахреин утре треба да се вратат во земјава со специјален лет организиран од Владата, соопшти Министерство за надворешни работи и надворешна трговија.

- Advertisement -

Според информациите на министерството, авионот на саудиската авиокомпанија „Флајнас“ ќе полета од Меѓународен аеродром Крал Халид.

Кога и каде треба да се јават граѓаните

Македонските државјани кои се наоѓаат во Ријад треба да бидат на аеродромот на 11 март во 17 часот по локално време, на Терминал 1, за да ги завршат процедурите пред полетувањето на специјалниот лет.

За македонските граѓани кои се наоѓаат во Кувајт е организиран автобуски превоз кон Ријад. Автобусот ќе тргне ноќта меѓу вторник и среда, односно на 10 март во 00:00 часот, по локално време, од Кувајт и ќе ги превезе патниците до аеродромот во Ријад, каде што ќе се приклучат на летот за Скопје.

И за македонските државјани во Манама е организиран автобуски превоз. Автобусот ќе тргне на 11 март во 06:00 часот наутро и ќе ги превезе патниците до аеродромот во Ријад, од каде ќе продолжат со специјалниот лет кон Македонија.

Министерството ги повика сите патници навреме да пристигнат на местата на поаѓање, со цел непречено завршување на процедурите пред патувањето.

Муцунски: Во тек е евакуација од повеќе земји

Министерот за надворешни работи и надворешна трговија Тимчо Муцунски изјави дека во тек е координирана операција за враќање на македонските државјани од повеќе земји на Блискиот Исток.

– Од првиот момент на ескалацијата на безбедносната криза беше воспоставен кризен механизам преку Министерството и дипломатско-конзуларните претставништва. Во постојана комуникација сме со нашите граѓани со цел нивно безбедно и организирано враќање – изјави Муцунски.

Тој додаде дека ова е трета сложена евакуациска операција во последните 12 месеци.

Во меѓувреме, во неделата вечерта на скопскиот аеродром пристигнаа 151 патник од Обединети Арапски Емирати со лет на авиокомпанијата Флајдубаи. Поголемиот дел од патниците беа македонски државјани, а меѓу нив имаше и граѓани од Црна Гора, Босна и Херцеговина, Србија, Косово и Холандија.