Жителите на руската област Курск бараат да се воспостават хуманитарни коридори за евакуација на цивилите од деловите на регионот под контрола на украинската војска. Киев најави дека се подготвени да го направат тоа доколку Москва официјално ги побара коридорите. Кремљ одби јавно да ја коментира понудата.
Киев во четвртокот објави дека е подготвен да воспостави хуманитарни коридори од пограничниот регион Курск, кој е делумно окупиран од украинската армија, за евакуација на цивили кон внатрешноста на Русија, доколку тоа го сака Москва. „Како одговор на можното официјално барање од Москва, подготвени сме да воспоставиме хуманитарен коридор од регионот Курск до внатрешноста на Русија“, се вели во соопштението на канцеларијата на украинскиот претседател Володимир Зеленски за АФП, додавајќи дека досега не добиле такво барање.
Жителите на пограничниот регион се сè поотворено незадоволни од руските власти, особено оние кои изгубиле контакт со членовите на семејството и веруваат дека се заробени на украинската страна од линијата на фронтот. Тие се залагаат за воспоставување хуманитарни коридори кои ќе овозможат евакуација на цивили. Во меѓувреме, Москва во врска со украинската понуда објави дека „ова прашање зависи од контактите меѓу војските на двете земји, кои се разбира не можеме да ги спроведеме јавно“.
Понудата од Киев доаѓа во време кога руските власти известуваат за нова украинска контраофанзива во Курск, на десетина километри од границата. Во четвртокот Зеленски ги пофали своите војници за офанзивата во Курск и додели одликувања на неколку единици. „Окупаторот може да биде поразен дури и на своја територија“, напиша тој на социјалните мрежи.
Рускиот претседател Владимир Путин во средата по состанокот со гувернерот на Курск призна дека ситуацијата во регионот е „многу комплицирана“, но не одговори директно на повиците на локалното население да се евакуираат цивилите од областите на фронтот.
Украинската армија ја изненади Русија минатиот август со инвазијата на пограничниот регион Курск и шест месеци подоцна ја одржува контролата врз дел од тамошната територија. Русија врати одредена територија, но Украина сè уште окупира десетици погранични населби околу градот Суџа, каде, според украинските сили, останаа нешто повеќе од 1.500 руски цивили.
