Претседателот на Украина, Володимир Зеленски, најави формирање на постојана проширена национална преговарачка група, која ќе работи на дипломатски напори за завршување на војната и воспоставување вистински и траен мир.
„Се одржа специјален состанок посветен на нашите дипломатски напори. Мораме да го искористиме секој механизам за мир и да покажеме јасна посветеност“, напиша Зеленски на Фејсбук.
Министерот за одбрана, Рустем Умеров, информирал за активностите на украинската делегација за време на разговорите во Турција. Средбите одржани на 15 и 16 мај, според Зеленски, ја покажале сериозната намера на Украина да работи на мирно решение, но и ја потенцирале потребата од зголемен притисок врз Русија за прекин на непријателствата.
Еден од најзначајните резултати од разговорите, според Зеленски, е постигнатиот договор за размена на 1.000 украински за 1.000 руски заробеници.
„Нашиот тим моментално работи на деталите за размената. Благодарен сум на сите што придонесоа за овие напори“, истакна украинскиот претседател.
