По затворањето на гласачките места, Државната изборна комисија (ДИК) вечерва ја одржа завршната прес-конференција на која ги соопшти неофицијалните резултати од првиот круг на локалните избори.
Претседателот на ДИК, Борис Кондарко, информираше дека излезноста на овие избори изнесувала 48,46 проценти, што е нешто пониска во однос на претходните изборни циклуси.
Според првичните податоци, во трката за градоначалник на Град Скопје води Орце Ѓорѓиевски од ВМРО-ДПМНЕ со освоени 77.858 гласови или 39,9 проценти од обработените 86 проценти од гласачките места. Зад него се Амар Мециновиќ од Левица со 26.119 гласови (13,4 проценти) и Каја Шукова од СДСМ со 22.666 гласови (11,52 проценти).
Со тоа, во вториот круг за градоначалник на главниот град ќе се соочат Ѓорѓиевски од ВМРО-ДПМНЕ и Мециновиќ од Левица.
Од Комисијата посочија дека досега се обработени 96,11 проценти од гласачките ливчиња, односно 3.339 од вкупно 3.474 избирачки места, што претставува речиси целосна слика за резултатите.
Според овие податоци, ВМРО-ДПМНЕ и коалицијата што ја предводи се во убедливо водство во 54 општини низ државата, додека коалицијата „Вреди“ води во девет, СДСМ во седум, а коалицијата НАИ предводена од ДУИ во пет општини. Демократската партија на Турците има предност во една општина.
Кондарко потенцираше дека изборниот ден поминал мирно, со неколку помали нерегуларности кои не влијаеле врз изборниот процес.
