Туск: Никој нема да ја сфати ЕУ сериозно освен ако не се вооружи и не е обединета како никогаш досега

Полскиот премиер Доналд Туск денес изјави дека никој нема да ја сфати Европската Унија сериозно, ниту непријателите ниту сојузниците, ако не се вооружи, не верува во сопствената сила и не остане обединета во согласност со слоганот „сите за еден, еден за сите“.

„Конечно мора да веруваме во нашата сила, да продолжиме да се вооружуваме и да бидеме обединети како никогаш досега. Еден за сите, сите за еден. Инаку, сме осудени на пропаст“, ​​рече Туск на мрежата X.

Пораката од полскиот премиер доаѓа по интервенцијата на САД во Венецуела, по што, во текот на викендот, американскиот претседател Доналд Трамп се закани дека уште неколку земји би можеле да бидат цел и повтори дека на Американците итно им е потребен Гренланд, што директно ги засега интересите на една од членките на ЕУ – Данска.

- Advertisement -

Полскиот министер за надворешни работи Радослав Сикорски синоќа во интервју за англискиот канал на полскиот јавен телевизиски сервис TVP WORLD предупреди дека иако не верува дека САД целосно ќе се повлечат од Европа, овој сојуз ќе биде различен од порано.

„Доколку САД се вклучат во војна во Азија, што не можеме да го исклучиме, можеби нема да можат да ни помогнат. Затоа, до крајот на деценијата мора да имаме на располагање такви вооружени сили што Путин нема да се осмели да ги тестира“, рече шефот на полската дипломатија.

Сикорски рече дека кога станува збор за Полска, постојат индикации дека САД ќе инвестираат стотици милиони долари во бази во Полска.

„Тие имаат многу поволен договор. Ние плаќаме 15.000 долари годишно за секој американски војник тука. Поевтино е за САД да ги чуваат и обучуваат своите војници тука“, рече Сикорски.

Полскиот министер за надворешни работи го изрази својот страв дека руско-украинската војна ќе се претвори во замрзнат конфликт и дека предавањето на Донбас на Русија ќе биде награда за агресорот и само рецепт за следната војна.

„Со оглед на напредокот на руската армија на фронтот, на Путин ќе му бидат потребни децении за да ја освои Украина. Но, тоа е проблемот со диктаторите, бидејќи кога сте на власт 20 години, никој нема да ви каже како стојат работите навистина“, рече Сикорски.

Според полскиот министер за надворешни работи, праведно решение за конфликтот во Украина може да дојде само кога руските елити ќе сфатат дека инвазијата била грешка.

„На крајот од војната, Украина мора да може да се интегрира во ЕУ, но и да ги брани своите граници. Во спротивно, постои рецепт за следната војна. Праведно решение ќе има само кога руските елити ќе признаат дека првичната инвазија била грешка и дека обновата на руската империја е невозможна“, рече Сикорски, гостин во ТВП ВОРЛД.