Турција во среда ги предупреди Русија и Украина да престанат да напаѓаат енергетската инфраструктура. Предупредувањето од турскиот министер за енергетика Алпарслан Бајрактар следува по украинските напади со беспилотни летала врз танкери поврзани со Русија во Црното Море во последните денови.
Бајрактар во среда во Истанбул изјави дека секое нарушување на енергетската инфраструктура влијае на глобалните пазари и животите на луѓето, истакнувајќи дека енергетските капацитети во двете земји веќе се погодени во напади, објави француската новинска агенција АФП. „Им кажуваме на Русија и Украина да не се вклучуваат во оваа војна против енергетската инфраструктура бидејќи таа е многу поврзана со секојдневниот живот на луѓето“, рече турскиот министер.
Минатиот петок, експлозија покрај турскиот брег во Црното Море погоди два празни танкери за нафта, од кои барем еден беше на пат кон руско пристаниште. Украински безбедносен извор изјави за АФП дека украинските сили користеле беспилотни летала за да нападнат бродови што „тајно транспортирале руска нафта“.
Во вторник, трет танкер беше погоден на пат од Русија кон Грузија, наводно превезувајќи сончогледово масло. Русија, исто така, тврди дека бил погоден од дрон, но Украина негира каква било вмешаност.
Бајрактар истакна дека енергетските капацитети постојано биле цел на двете страни за време на конфликтот. Според него, Турција сака енергетската инфраструктура да се држи надвор од овој конфликт и затоа повика на одржување на непречен проток на енергија во Црното Море, Турскиот Теснец и преку цевководи.
Во последните недели, САД извршија притисок врз сојузниците, вклучително и Турција, да го намалат увозот на нафта и гас од Русија. Бајрактар тврди дека Анкара отсекогаш била транспарентна со Вашингтон во врска со нејзините потреби за снабдување со руски гас.
Тој, исто така, ја нагласи потребата од диверзифицирано портфолио на снабдување, бидејќи Турција не сака да зависи само од една земја. „Ни треба гас од Русија, ни треба и гас од Иран, од Азербејџан и многу други извори“, рече тој.
Анкара и Москва се во процес на преговори за продолжување на договорот за снабдување со гас, кој истекува на 31 декември. Се очекува рускиот енергетски гигант „Газпром“ да продолжи со снабдувањето следната година, но Бајрактар рече дека Турција сега се фокусира на краткорочни договори.
