„Царините на Трамп се брутални, неосновани и шокантни“

Царините што синоќа ги објави американскиот претседател Доналд Трамп се брутални и неосновани и претставуваат шок за меѓународната трговија, вели францускиот претседател Емануел Макрон.

Тој рече дека Европа мора да одговори на овие мерки поединечно во секој индустриски сектор.

За време на состанокот со претставниците на француската индустрија Макрон додаде дека одговорот на реципрочните царини ќе биде „помасовен“ од одмаздничките мерки против американските царини за челик и за алуминиум.

- Advertisement -

Тој ги повика француските компании кои работат во САД да ги прекинат сите инвестициски проекти во таа земја, додека не се разјасни најавата на Трамп за масовно зголемување на царините на увозот од Европската унија.

– Тоа што е важно е дека идните или најавените инвестициски проекти во последните неколку недели се привремено суспендирани, додека не ги разјасниме работите со САД. Каква ќе порака ќе се испрати доколку главните европски бизнис играчи почнат да инвестираат милијарди евра во американската економија во време кога француската економија е нападната – праша францускиот претседател за време на средбата со претставниците на француските индустриски сектори кои се најпогодени од најавените американски царини.