Трамп се потсмева со Гренланд и вели дека ќе го земе „на еден или на друг начин“

Зборувајќи со новинарите на авионот „Ер Форс Уан“, американскиот претседател Доналд Трамп рече дека е отворен за склучување договор за Гренланд во принцип, но инсистираше дека „на еден или друг начин, ќе го добиеме Гренланд“, објави британски Гардиан.

– Ако не го земеме Гренланд, ќе го земат Русија или Кина, а јас нема да дозволам тоа да се случи – рече Трамп, и покрај тоа што нема очигледен интерес да преземе целосна контрола врз територијата од која било од двете земји.

Трамп, исто така, се потсмеваше на одбраната на Гренланд, велејќи дека таа се состои од „две санки со кучиња“, соочени со руски и кинески „разорувачи и подморници насекаде“.

- Advertisement -

На прашање како тоа ќе влијае на НАТО Трамп рече: „Ако влијае на НАТО, нека влијае на НАТО. Но, знаете, тие имаат потреба од нас многу повеќе отколку што ни требаат тие нам“.

Тој, исто така, тврдеше дека ја „спасил“ Алијансата со тоа што се залагал за зголемување на трошоците за одбрана и рече дека работи на прекин на руската инвазија на Украина.

Неговите коментари дојдоа неколку часа откако данската премиерка, Мете Фредериксен, предупреди дека Данска е во „судбоносен момент“ поради заканите на Трамп дека ќе го преземе Гренланд, обвинувајќи ги САД дека потенцијално ќе му го свртат грбот на НАТО.

– Ние сме на раскрсница, а ова е судбоносен момент. Она што е во прашање е поголемо од она што окото може да го види. Ако она што го доживуваме од Американците е дека тие всушност ѝ го вртат грбот на западната алијанса, ѝ го вртат грбот на нашата соработка со НАТО со закани од сојузник, што не сме го доживеале досега, тогаш сè ќе престане – рече Фредериксен.

Набргу откако Доналд Трамп го отстрани претседателот на Венецуела, Николас Мадуро, минатиот викенд, тој брзо се префрли на темата Гренланд, обновувајќи ги повиците за преземање на арктичката територија од страна на САД. Американскиот претседател во неделата изјави дека Гренланд му е „многу потребен“, што предизвика зголемување на тензиите меѓу САД, Гренланд и Данска.

Гренланд е дел од данското кралство. Данска порано го владееше како колонија, а денес сè уште ја контролира неговата надворешна и безбедносна политика.

Мете Фредериксен, данската премиерка, изјави дека нападот на САД врз сојузник на НАТО – во овој случај Гренланд, како дел од Данска – би значел крај на алијансата. Премиерот на Гренланд, Јенс-Фредерик Нилсен, го повика Трамп да се откаже од своите „фантазии за анексија“. Европските лидери, исто така, им дадоа поддршка на Данска и на Гренланд, велејќи дека „Гренланд им припаѓа на нејзините луѓе“.