Американскиот претседател Доналд Трамп потпиша извршна наредба со која се намалуваат буџетите и надлежностите на „Гласот на Америка“ и на уште 6 федерални агенции.
Според наредбата, овие институции мора да ги сведат своите активности на минимум дозволени со закон.
„Оваа наредба е продолжение на намалувањето на делови од федералната бирократија, кои претседателот ги смета за непотребни“, се наведува во документот објавен доцна синоќа.
Покрај „Гласот на Америка“, мерките се насочени кон уште шест агенции, меѓу кои и Институтот за музејска и библиотечна служба, Американскиот меѓуагенциски совет за бездомни лица и Агенцијата за развој на малцинските бизниси.
Наредбата е дел од пошироката стратегија на Трамп за реформирање на федералниот апарат, што ја спроведува Одделот за владина ефикасност, предводен од милијардерот Илон Маск.
Досега, тимот на Маск предложи укинување на над 100.000 работни места од вкупно 2,3 милиони во федералната влада, како и кратење на помошта за странски држави и замрзнување на илјадници програми.
Некои републиканци одамна го обвинуваат „Гласот на Америка“ за пристрасност против конзервативците.
Месецов Маск повика на затворање на медиумот, како и на Радио Слободна Европа.
