Трамп остро го нападна претседателот на Израел

Топ Вести - Слушај сега

Американскиот претседател Доналд Трамп изјави дека одбивањето на израелскиот претседател Исак Херцог да го помилува премиерот Бенјамин Нетанјаху е срамно.

- Advertisement -

– Имате претседател кој одбива да му даде помилување. Мислам дека тој човек треба да се засрами. Примарната моќ што ја има претседателот на Израел, е моќта да дава помилувања. Тој рече дека го барал пет пати, но не сака да го стори тоа, бидејќи претпоставувам, ја губи својата моќ. Мислам дека народот на Израел треба навистина да се засрами од него. Штета што не го дава – изјави Трамп пред новинарите во Овалната соба.

Нетанјаху официјално побара помилување на 30 ноември минатата година, барајќи ослободување од обвиненијата за корупција, без да признае вина или да се повлече од јавниот живот.

Од канцеларијата на Херцог појаснија дека барањето на премиерот моментално го разгледува Министерството за правда.

„Дури откако ќе заврши тој процес, претседателот Херцог ќе го разгледа барањето во согласност со законот, во најдобрите интереси на Државата Израел, воден од својата совест и ослободен од какво било влијание од надворешни или внатрешни притисоци од каков било вид“, се додава во соопштението.

Од почетокот на судењето, Нетанјаху постојано ги негира сите обвиненија, иако според израелскиот закон, претседателот може да даде помилување само по признание на вината.

Премиерот се соочува со обвиненија во три одделни случаи, познати како Случај 1000, Случај 2000 и Случај 4000. Обвиненијата беа поднесени кон крајот на ноември 2019 година од тогашниот државен обвинител Авичаи Манделблит.

Случајот 1000 се фокусира на обвинувањата дека Нетанјаху и членови на неговото семејство прифаќале скапи подароци од богати бизнисмени во замена за политички услуги.

Случајот 2000 вклучува обвинувања дека Нетанјаху разговарал со Арнон Мозес, издавач на приватниот весник „Једиот Ахронот“, во обид да обезбеди поволно медиумско известување.

Случајот 4000 се фокусира на обвинувањата дека Нетанјаху му дал регулаторни услуги на Шаул Елович, поранешен сопственик на веб-страницата „Вала“ и висок извршен директор во телекомуникациската компанија „Безек“, во замена за поволно медиумско известување.

Нетанјаху е исто така обвинет и има потерница издадена од Меѓународниот суд на правдата за злосторства против човештвото за време на израелската офанзива врз Газа, во која загинаа десетици илјади луѓе.