Американскиот претседател Доналд Трамп, пред десетици илјади граѓани на стадионот во Атланта, одржа емотивен говор на комеморацијата за Чарли Кирк, кого го нарече „мачeник чието име засекогаш ќе живее во хрониката на најголемите американски патриоти“.
Претседателот посебно им се обрати на родителите на Кирк и на неговата вдовица Ерика, изразувајќи длабоко сочувство и нагласувајќи дека Кирк, иако имал само 31 година, „донел повеќе добро и љубов на овој свет отколку што многумина прават за цел живот“.
Трамп потсети дека Кирк пред смртта му порачал: „Господине, ве молам, спасете го Чикаго“, додавајќи дека ќе го исполни тоа ветување и ќе го заштити градот од криминал.
Во текот на говорот, тој ја повика Ерика Кирк на сцената, а присутните ја поздравија со громогласен аплауз.
– Лекцијата од животот на Чарли е дека никогаш не треба да се потценува што може да направи една личност со добро срце, праведна кауза и волја да се бори – рече Трамп.
Претседателот најави дека Кирк ќе биде постхумно одликуван со Претседателскиот медал за слобода. Церемонијата ќе се одржи во Белата куќа, за која, како што кажа, „Кирк длабоко ја почитувал“.
Покрај емотивните моменти, Трамп говорот го искористи и за политички пораки. Тој ги нападна „левичарските манијаци“ за, како што рече, поттикнување политичко насилство, обвини дел од медиумите и го исмеа Џо Бајден.
Дополнително, предизвика контроверзии со тврдењето дека лекот Тиленол е „причина за аутизам“, што е спротивно на медицинските упатства.
Во завршниот дел, додека вдовицата Ерика повика на прошка во духот на верата, Трамп отворено изјави: „Го мразам мојот противник и не му посакувам се најдобро“.
