Трамп му се заканува на Техеран со моќно оружје доколку преговорите пропаднат

Иран нема карти освен краткорочно уценување на светот со меѓународните бродски линии, објави американскиот претседател Доналд Трамп на социјалната мрежа Икс.

За две минути тој на Икс објави два поста за Иран.

Иранците денес се живи за да преговараат

„Иранците се чини дека не сфаќаат дека немаат карти освен краткорочно уценување на светот со користење на меѓународните пловни линии. Единствената причина зошто се живи денес е за да преговараат“, напиша Трамп.

- Advertisement -

Во друг пост, тој додаде дека Иранците се подобри во односите со јавноста, отколку во војна.

„Иранците се подобри во справувањето со лажните медиуми и односите со јавноста, отколку во борбата“, објави Трамп.

Најновите објави на американскиот претседател доаѓаат пред мировните разговори меѓу американските и иранските делегации во Исламабад, Пакистан.

Претходно денеска тој објави порака која остава многу простор за толкување:

„Најмоќното ресетирање на светот“, објави на социјалната мрежа Трут соушл.

Што точно мислеше американскиот претседател со ова, засега останува нејасно.

Нов ултиматум на Иран

Трамп денеска изјави дека американските воени бродови се преполнуваат со најдобра муниција како подготовка за продолжување на нападите врз Иран доколку мировните преговори во Пакистан не успеат.

Во Исламабад ќе преговара потпретседателот Џеј Ди Венс, а ќе му се придружат специјалниот пратеник Стив Виткоф и зетот на Трамп, Џаред Кушнер. Разговорите следат откако во вторникот беше договорено двонеделно примирје, откако Трамп објави дека„ќе биде уништена една цивилизација“.

На прашањето дали верува во успехот на преговорите, Трамп во телефонското интервју за „Њујорк пост“ рече:

– Ќе знаеме за околу 24 часа. Сè ќе биде јасно наскоро.

Подготвени сме за нов почеток, додаде тој.

– Ги товариме бродовите со најдобра муниција, најдоброто оружје што некогаш е направено, дури и подобро од она што го користевме за да ги уништиме претходно. И ако не постигнеме договор, ќе го употребиме, и тоа многу ефикасно – додаде тој.

Клучни точки на преговорите

Се очекува разговорите да се фокусираат на барањата на САД Иран да предаде околу 450 килограми збогатен ураниум, за кој се вели дека е длабоко закопан и повторно да го отвори Ормускиот Теснец за меѓународен пловен сообраќај. Трамп нагласи дека повторното отворање на теснецот е клучна компонента на секој договор за прекин на огнот, иако малку бродови поминаа низ него откако САД престанаа да го бомбардираат Иран.

Други важни теми ќе бидат крајот на иранската поддршка на регионалните сојузници, статусот на програмата за балистички ракети и барањето на Техеран за укинување на санкциите.

САД се сомневаат во искреноста на Иран

Иранската делегација во Исламабад треба да ја предводат министерот за надворешни работи, Абас Арагчи и претседателот на Парламентот, Мохамед Бакер Калибаф. Арагчи во преговорите пред војната инсистираше дека Иран има неотуѓиво право да збогатува ураниум.

– Имаме работа со луѓе за кои не знаеме дали ја кажуваат вистината или не. Тие ни кажуваат в лице дека се ослободуваат од своето нуклеарно оружје и дека сè е исчезнато. А потоа излегуваат пред печатот и велат: „Не, би сакале да збогатуваме“. Па, ќе видиме – рече Трамп.

Иранска војска: „Прстите ни се на чкрапалото“

Иранската војска изјави дека „ги држи прстите на чкрапалото“ поради постојаното „кршење на довербата“ од страна на САД и Израел, објави Централната команда на Хатам ал-Анбија, според новинската агенција Тасним.

Военото тело додаде дека Иран нема да се откаже од Ормускиот Теснец, врз кој ја презеде контролата.

Исламабад е под невидени безбедносни мерки

Во Исламабад, каде што ќе се одржат мировните преговори меѓу САД и Иран се воведени обемни и невидени безбедносни мерки.

Околу 10.000 припадници на безбедносните сили, полицијата, паравоените единици и армијата се распоредени на клучни локации. Црвената зона е целосно затворена.

Пред почетокот на официјалните разговори, планирани се прелиминарни состаноци меѓу двете делегации, но преговорите ќе се водат индиректно.

Иран веќе го потпиша Договорот за неширење на нуклеарно оружје и изјави дека нема да развива нуклеарно оружје, но во исто време нагласува дека нема компромис за балистичките ракети, кои ги смета за клучни за својата одбрана.