Трамп и Руте зборувале и за ретките минерали и за „Златна купола“

Топ Вести - Слушај сега

Дипломати ја разгледуваат опцијата според која САД би добиле суверенитет над помали делови од Гренланд со цел таму да воспостават воени бази, пишува „Њујорк Тајмс“. Весникот го споредува овој модел со статусот што го има Обединетото Кралство над своите бази на Кипар.

- Advertisement -

По најавите на американскиот претседател Доналд Трамп дека постигнал рамковен договор со НАТО се зголемија написите за тоа што реално би можеле САД да добијат. Трамп по средбата со генсекот на НАТО во Давос на социјалните мрежи напиша дека нема да ги воведе најавените царини за Европа на 1 февруари.

Во исто време, тој се обиде да ги ублажи своите пораки велејќи дека САД нема да употребат сила за да ја преземат територијата, но нагласи дека планираат да користат економска и дипломатска моќ за да го „добијат“ Гренланд.

Минерални богатства и Златна купола

Трамп им изјави на новинарите дека можниот договор би можел да вклучува права на минералните богатства на Гренланд. Тој додаде дека европските сојузници би можеле да соработуваат на вториот план на Трамп, одбранбен систем наречен „Златна купола“, кој би ги штител САД од ракетни напади со голем дострел.

Покрај стратешката положба на Гренланд, САД зборуваа и за огромните и главно неискористени резерви на ретки земни минерали на островот, од кои многу се клучни за технологии како што се мобилните телефони и електричните возила.

– Тоа е ултимативниот долгорочен договор. Ги става сите во многу добра позиција, особено кога станува збор за безбедноста и минералите. Тоа е договор кој трае засекогаш, порача Трамп.

Неограничен број војници, ограничен број бази

Според постојните договори со Данска, САД можат да распоредат неограничен број војници на Гренланд. Веќе сега има повеќе од 100 постојано стационирани припадници на војската во базата Питуфик на северозападниот дел на територијата.

Опцијата што се разгледува е САД да не го купат целиот остров, туку да добијат целосен суверенитет над одредени делови од територијата на Гренланд за воени бази.

Но, колку војска би можеле да распоредат САД по новиот пробив во разговорите со ЕУ?

Нема купување, ниту закуп?

Генералниот секретар на НАТО изјави дека на состанокот со Трамп не разговарал за клучното прашање на данскиот суверенитет над Гренланд. Трамп претходно ја отфрли идејата за закуп на Гренланд.

Портпаролката на НАТО, Алисон Харт, изјави дека дискусиите меѓу сојузниците за рамката што ја спомена претседателот ќе се фокусираат на безбедноста на Арктикот преку заеднички напори, особено на седумте арктички членки на Алијансата.

Таа додаде дека преговорите меѓу Данска, Гренланд и САД ќе продолжат за да се осигураат дека Русија и Кина „никогаш нема да добијат економски или воено упориште во Гренланд“.

„Имаме уште многу до договор“

Во исто време, таа нагласи дека Руте не предложил никаков компромис за суверенитетот за време на состанокот со Трамп.

– Мислам дека состанокот вечерва беше многу добар. Но, сè уште имаме многу работа да направиме – изјави тој за АФП.

Данскиот министер за надворешни работи, Ларс Леке Расмусен, рече дека сигналите на Трамп се сè уште смирувачки:

– Тој рече дека ќе ја запре трговската војна. Рече дека нема да го нападне Гренланд. Тоа се позитивни пораки.

„Минерали? Ништо без нас“

Но, во Гренланд, пораките беа примени многу поостро. Пратеничката од Гренланд, Аја Кемниц Ларсен, рече дека НАТО нема мандат да преговара за ништо поврзано со Гренланд без учество на жителите на Гренланд.

„Ништо за нас без нас“, напиша таа, нарекувајќи ја идејата НАТО да одлучува за суверенитетот или минералните ресурси на Гренланд „целосно неприфатлива“.,

„Волстрит падна поради Исланд, не Гренланд“

Заканите на Трамп со царини предизвикаа загриженост и критики во Европа, но и нервоза на американскиот пазар. Во вторник, првиот ден на тргување откако Трамп ги упати заканите, Волстрит го забележа својот најлош ден од октомври.

Трамп се обиде да ја преземе заслугата за рекордните цени на акциите во Давос, но призна дека тие паднале оваа недела „поради Исланд“, очигледно мислејќи на Гренланд.