Српскиот лидер вели дека на самитот се разговарало за инфрастуктурни проекти

Претседателот на Србија, Александар Вучиќ изјави во Тирана дека денеска на самитот на Европската политичка заедница разговарал за реализација на специфични инфраструктурни проекти, како што е изградбата на гасен интерконектор меѓу Србија и Северна Македонија, јавија белградските медиуми.

– Разговаравме и за некои конкретни проекти во врска со инфраструктурните врски, имено интерконекторот со Северна Македонија, за да можеме да размислиме за дополнителни гасни врски во иднина. Разговаравме и за други инфраструктурни проекти, за целата Агенда за раст и за Единствената европска платна зона – СЕПА – изјави Вучиќ.

Тој посочи дека СЕПА е важна за Србија и за српските компании, но и за луѓето кои живеат и работат во странство, поради дознаките што ги испраќаат во државата.

- Advertisement -

– Се боревме за земјата и мислам дека направивме добра работа. Разговарав и со луѓе од регионот, освен на вечерата синоќа, а денеска и со Жељка Цвијановиќ, но кратко време, и со Андреј Пленковиќ и со многу други лидери, и секако, бев со Ердоган, и мислам дека за кратко време постигнавме многу и договоривме многу средби за следниот период.