Случајот на 22-годишен студент кој штрајкуваше со глад во знак на протест против продолжувањето на неговиот притвор по насилните августовски протести во Нови Сад е во центарот на вниманието во Србија. Случајот стигна и до Европскиот суд за човекови права (ЕСЧП) во Стразбур, кој ќе одлучи за привремена мерка против Србија, според српските медиуми.
Богдан Јовичиќ, студент на Технолошкиот факултет во Нови Сад, беше уапсен на 15 август под сомнение за учество во уништувањето на просториите на владејачката Српска напредна партија (СНС) за време на протестите во Нови Сад. На 12 септември, судот го продолжи неговиот притвор за 30 дена, а неколку дена подоцна ја отфрли неговата жалба.Потоа, поддржувачите на Јовичиќ покренаа онлајн петиција со која бараат негово ослободување, која досега ја потпишаа повеќе од 65.000 луѓе.
Во петицијата се истакнува дека судот го продолжил притворот на Јовичиќ без соодветни докази за извршено кривично дело. Неговиот татко починал додека бил во притвор, а за неговата смрт дознал пет дена подоцна, бидејќи на неговата мајка ѝ било дозволено да го посетува само еднаш неделно. На погребот бил донесен со лисици, се вели во петицијата.
Јовичиќ започна штрајк со глад откако му беше продолжен притворот, а шест дена подоцна беше префрлен во затворската болница во Белград. Тој го заврши штрајкот со глад во вторник.
Според белградскиот весник „Данас“, случајот го разгледува и ЕСЧП, кој му испратил писмо на Јовичиќ по приемот на жалбата, барајќи од него да го прекине штрајкот со глад за време на процесот на донесување одлука, изјави за „Данас“ во вторник неговиот адвокат, кој ја поднесе жалбата до ЕСЧП.
Тој исто така рече дека судот во Стразбур го презел случајот, назначил судија и започнал со собирање информации, и ќе одлучи за привремена мерка против Србија.
Протестите во Србија траат уште од уривањето на настрешница на железничката станица во Нови Сад на 1 ноември минатата година, во која загинаа 16 лица. Демонстрантите бараат одговорност и правда за жртвите на трагедијата и предвремени избори, а протестите прераснаа во израз на гнев поради системската корупција и репресија, ограничувањата на слободата на медиумите и владеењето на правото.
