Милијардерот Илон Маск и унгарскиот премиер Виктор Орбан не му ја честитаа победата на новоизбраниот германски канцелар Фридрих Мерц. Се чини, дека честитки од Маск и Орбан доби само лидерката на второполасираната Алтернатива за Германија, Алис Вајдл.
„Народот на Германија во огромен број гласаше за промена. Сакам да и честитам на Алис Вајдл за удвојувањето на уделот на АфД од гласовите. Среќно и господ да ја благослови Германија!“, напиша Орбан кој во последните денови од кампањата на Вајдл се сретна со неа во Будимпешта.
Илон Маск се надоврза на честитката на Орбан:
„Навистина, честитки Алис Вајдл! Со оваа стапка на раст, АфД ќе биде мнозинската партија до следните избори“.
Маск не ги криеше своите симпатии за Вајдл и уште пред изборите во Германија тој направи онлајн-интервју со неа.
Самоуверената Вајдел уште еднаш предвиде дека партијата ќе ја победи ЦДУ на изборите во следните неколку години и „ќе воведе ред во Германија“. Таа истакна дека партијата освоила двојно повеќе гласови во источна Германија од ЦДУ, обезбедувајќи 45 од 48 достапни места таму.
На прашањето дали Илон Маск ја контактирал по силниот изборен резултат на АфД, таа рече:
– Утрово, кога го вклучив телефонот, видов дека добив повици и пораки од САД, вклучително и од Илон Маск со лични честитки.
