Со враќањето на Дарко Стојанов од Белград, започна постепеното враќање на повредените во пожарот во Кочани. Стојанов, кој е во стабилна здравствена состојба, вчера беше пречекан од министерот за здравство Арбен Таравари и министерот за надворешни работи Тимчо Муцунски.
Според протоколите на Кризниот штаб во Министерството за здравство, секој пациент што ќе се врати од лекување во странство ќе помине најмалку 24 часа на опсервација во домашна клиника.
Директорот на Клиниката за токсикологија, Андон Чибишев, информира дека Стојанов е во добра клиничка состојба и е под медицинска опсервација.
– Во моментот се прават неопходните клинички испитувања. Тој е прегледан, во добра состојба е и со стабилни параметри. Ќе направиме дополнителни анализи за да бидеме сигурни дека можеме да го пуштиме дома – изјави Чибишев.
Во моментов, 115 лица од пожарот во Кочани се лекуваат во Србија, Словенија, Бугарија и други земји. Лекарите предупредуваат дека периодот на опоравување ќе зависи од индивидуалната здравствена состојба на секој пациент, а можни компликации, како инфекции, може да го продолжат лекувањето.
Во Словенија четворица пациенти со тешки изгореници се под интензивна нега, а нивната состојба останува критична. Во Бугарија, пак, петмина од 15-те хоспитализирани пациенти се малолетни, при што најголем ризик претставуваат последиците од вдишување токсични гасови.
Македонските здравствени власти очекуваат во наредните недели да бидат вратени уште пациенти, но за многумина лекувањето ќе продолжи подолг период.
