Израелскиот министер за финансии, ултрадесничарот Безалел Смотрич, денеска го повика Израел да го окупира Појасот Газа и да воспостави воена управа, заканувајќи се дека во спротивно ќе ја собори владата.
Во изјавата за военото радио, Смотрич, лидер на партијата Религиозен ционизам, изјави дека Израел „мора да ја окупира Газа и да формира привремена воена влада, бидејќи нема друг начин да се победи Хамас“.
– Ќе ја соборам владата ако таа не се врати на борбите на начин што ќе нè наведе да го преземеме целиот Појас Газа и да владееме со него – рече Смотрич.
Тој го критикуваше генерал полковникот Херзи Халеви, началникот на Генералштабот, тврдејќи дека неговата стратегија е слаба.
– Да бев премиер, ќе му кажев на началникот на Генералштабот: „Ова е мојата политика, ако не ја спроведувате, одете дома“ – додаде министерот Смотрич.
Тој инсистира Израел да ја преземе безбедноста и контролата на хуманитарната помош за Газа.
Нетанјаху во претходните изјави најави дека Израел нема план да ја освои Газа или трајно да ја окупира.
Израелскиот министер за надворешни работи Гидеон Саар денеска, непосредно по почетокот на прекинот на огнот во војната во Газа, предупреди дека регионалната нестабилност ќе продолжи ако Хамас остане на власт.
– Нема иднина, нема мир, стабилност и безбедност за двете страни доколку Хамас остане на власт во Појасот Газа – предупреди министерот Саар на прес-конференција во Ерусалим.
Претходно утрово и крајнодесничарскиот министер за национална безбедност Итамар Бен-Гвир поднесе оставка во знак на протест против прекинот на огнот меѓу Израел и Хамас во Појасот Газа.
Опстанокот на владата на Бенјамин Нетанјаху е неизвесен.
