Полското Министерство за европски фондови вчера ги суспендираше сите плаќања во рамките на програмата на Европската унија за финансирање хотели, ресторани и културни места откако иницијативата за транспарентност откри дека грантовите биле користени за јахти, барови за вотка и компанија регистрирана на истата адреса како и секс клуб.
Министерката за европски фондови, Катаржина Пелчинска-Наленч, изјави дека нема да се исплаќаат повеќе пари сè додека секој од приближно 2.400 грантови, во вкупна вредност од околу 1,2 милијарди злоти (282,3 милиони евра), не биде поединечно ревидиран, објави Политико.
„Секој злот ќе биде проверен“
„Секој злот ќе биде проверен“, изјави министерката за новинарите, обвинувајќи ги правилата изготвени од претходната влада на партијата Право и правда (ПиС). Целта, додаде Пелчинска-Наленч, е да се заштити јавната доверба во европските фондови и да се обезбеди дека парите всушност им помагаат на корисниците за кои се наменети.
Досега се исплатени околу 110 милиони злоти (25,8 милиони евра), со што поголемиот дел од буџетот на програмата е замрзнат. Шемата HoReCa, дел од планот за закрепнување на Полска од Ковид-19, имаше за цел да им помогне на малите бизниси во секторите за туризам и угостителство да ги диверзифицираат своите операции по пандемијата.
Брисел со години ги задржуваше исплатите од фондот за закрепнување на Полска од 59,8 милијарди евра поради спорови околу владеењето на правото со претходната влада, што го направи неговото евентуално одмрзнување клучен успех за премиерот Доналд Туск по неговата изборна победа во 2023 година.„Мирисаме огромна смрдеа и огромен долг“
Но, интерактивната онлајн мапа на корисници, објавена минатата недела, предизвика јавно незадоволство кај полската јавност поради купувања што предизвикаа чудење, од чамци и луксузен мебел до донации регистрирани на адресата на свингерски клуб. ПиС ја искористи контроверзноста за да ја обвини владата на Туск за клиентелизам и расипништво и да ги истакне пукнатините во владејачката коалиција.
„Овие средства беа наменети за обнова на Полска по пандемијата и создавање нови работни места“, изјави портпаролот на ПиС, Рафал Боченек, во вторник: „Туск вети развој што сите ќе го почувствуваат. Она што го мирисаме е огромна смрдеа и огромен долг што сите ќе мора да го отплатиме“.
Туск ја бранеше својата влада, обвинувајќи ја претходната администрација на ПиС за блокирање на средствата со години и со тоа за принудување на забрзана имплементација: „Сто проценти од одговорноста за овој вистински хаос со години паѓа на нашите претходници, кои ги блокираа овие средства и ни оставија многу малку време да ги трошиме правилно“.
„Министерството ги олабави процедурите“
„За да се осигури дека парите ќе стигнат до корисниците, министерството за европски фондови ги олабави процедурите и проверките, а некои го искористија ова, трошејќи на начини што луѓето со право ги сметаат за сомнителни, ако не и целосно криминални“, додаде Туск.
Портпаролот на Европската комисија во понеделник за радиото RMF FM изјави дека извршното тело на Европската Унија „внимателно ја следи ситуацијата“, но нагласи дека одговорноста за управување со средствата е на Варшава, пренесува Index.hr.
