Делови од Франција беа погодени од силни бури, при што инфраструктурата беше уништена. Три лица загинаа, две се уште се водат како исчезнати.
Пред неколку дена, делови од Франција беа погодени од силни бури, при што три лица загинаа на југот од земјата, а две лица сè уште се водат како исчезнати. Дождот предизвика големи штети низ целиот регион, пишува Дневник.хр.
Според извештаите на француските медиуми, постар пар загинал откако возилото со кое се обидувале да го напуштат својот дом било однесено од пороен дожд.
Уште едно лице почина во автомобил на друго место. Според локалната полиција, удавено лице е пронајдено во автомобил во општина Видаубан.
Според „Франс 24“, најлошо било во градовите Ле Лаванду и Борм-ле-Мимоза.
Според градоначалникот на Ле Лаванду, Жил Бернарди, инфраструктурата во градот е сериозно оштетена.
„Патишта, мостови, тротоари се под вода. Нема електрична енергија, вода, ниту пречистителна станица за отпадни води. Оваа количина вода нè шокираше бидејќи дојде ненадејно и насилно“, рече тој.
Прекини на електричната енергија и водата се пријавени и во градот Кавалиери, каде што за еден час наврнале 250 милиметри дожд. Паркинг во градот беше уништен, а десетици луѓе беа спасени, пишува France24.
Околу 200 пожарникари и 35 полицајци беа испратени на местото на настанот поради поплавите во покраината Вар.
