Претседателката Гордана Сиљановска Давкова ги посети повредените од катастрофалниот пожар во дискотеката „Пулс“ во Кочани кои се сместени во Градската болница „Свети Наум Охридски“ во Скопје.
– Прво надеж, а потоа болка. Млади луѓе се тоа ќе издржат, треба да ги охрабриме. Верувам дека повеќето од нив ќе се спасат, лекарите се тука… Не можам да сфатам како е можно ова да се случи – рече таа.
Прашана за причините за пожарот, за употребата на пиротехнички средства таа рече:
– Тоа е нешто што мора однапред да се предвиди. Не е прв пат ова да ни се случи.
Новинарката ја праша дали знае дека не постои веќе центар за изгореници.
– Не знам да ви кажам. Ова што го видов овде ми изгледа стручно. Не знам за центарот, добро што ми рековте, ќе прашам сега – рече претседателката.
Било што да ви треба, јавете се, им рече таа на родителите кои седеа на клупата пред болницата.
Претседателката соопшти дека директорот на болницата ќе напише сѐ што е потребно од медицински материјали, бидејќи најверојатно имале потреба од повеќе гази.
Претседателката рече и дека понуди за помош пристигнале од Воено-медицинската академија во Белград, како и од Бугарија и од други земји од регионот.
