„Школи на 21. век“ во училиштата од јануари 2026 година

Есенва ќе почне подготовката на наставниците за проектот „Школи на 21. век“ што треба да почне од јануари 2026 година. Тие, како што информираше денеска министерот за дигитална трансформација Стефан Андоновски, ќе ги учат алатките на вештачката интелигенција (ВИ) и сајбер безбедноста во наставата, како и примената на кодирањето.

Андоновски оцени дека ВИ во јавниот сектор сè уште се користи спорадично.

– Кон крајот на есента ќе почнеме со работа со наставниците, а во почетокот на јануари и со школите, најпрво во руралните средини. Паралелно, што се однесува на вештачката интелигенција, ја носиме националната стратегија на ИКТ. До крајот на есента мислам дека ќе помине на Влада. Еден од клучните столбови е ВИ, што значи дека ќе имаме специјален акциски план и рамка за нејзино прифаќање, прво во јавниот сектор, а потоа и во приватниот – истакна Андоновски.

- Advertisement -

Според Државниот завод за ревизија, напомена министерот, има десетина проекти со употреба на ВИ во јавниот сектор.

– Тоа не е нешто што е систематски. Јас лично повеќе претпочитам вистински да се користат алатките на машинско учење и ВИ во работата, отколку од тоа да се прави само пиар – подвлече Андоновски.

Првата пилот фаза на проектот „Школи на 21. век“ покажала дека наставниците се многу задоволни од функционирањето, а пристапот бил приемчив и за учениците.

– Мислам дека се подготвени и наставниците и учениците полека, алатка по алатка да стигнат до целосна употреба на ВИ. Но, одиме чекор по чекор – рече министерот Андоновски.