Кинеските државни нафтени компании, вклучувајќи ги Петро-Чајна, Синопек, СНООК и Женхуа Оил, привремено престанаа да купуваат нафта што се испорачува по морски пат од Русија. Одлуката, според извори запознаени со состојбата, е донесена поради стравувања од вторични санкции по новите американски мерки насочени кон руските нафтени гиганти Роснефт и Лукоил.
Одлуката на Пекинг доаѓа во време кога и Индија, еден од најголемите купувачи на руска сурова нафта испорачувана со танкери, најавува ограничување на увозот од Москва. Голем дел од кинескиот морски увоз на руска нафта се врши преку приватни независни рафинерии, но државните компании учествуваат со значителен обем – меѓу 250 и 500 илјади барели дневно.
Суспензијата не се однесува на испораките преку цевководите, особено не на нафтоводот кој ги поврзува руските полиња во Сибир со Кина, каде што снабдувањето засега останува стабилно.
Во Индија, најголемите рафинерии – меѓу кои Рилајанс Индистрис и повеќе државни компании – ги прегледуваат договорите со руските партнери за да избегнат прекршување на американските санкции. Некои од нив веќе сигнализираа дека би можеле да го намалат или целосно прекинат увозот на сурова нафта од Русија.
Рускиот претседател Владимир Путин изјави дека Русија „никогаш нема да подлегне на притисокот“ од САД, но призна дека новите санкции би можеле да предизвикаат економски тешкотии. Според него, мерките се дел од „непријателска медиумска и економска кампања“, но нема да ја променат надворешната политика на земјата.
Аналитичарите предупредуваат дека падот на побарувачката од Кина и Индија ќе го зголеми финансискиот притисок врз Москва, иако краткорочното влијание врз глобалните цени на нафтата може да биде умерено. Банкарскиот гигант УБС предвидува краткотрајна нестабилност на пазарот, но не и траен раст на цените, со оглед на сегашниот вишок на понуда на светско ниво.
