Руски хакери со жестоки напади на украинските сојузници

Група од 11 западни земји денеска објавија заедничко соопштение во кое остро ја обвинуваат Русија, односно нејзините воени разузнавачки хакери, за спроведување координирани кибер-напади врз одбранбени, транспортни и технолошки компании кои обезбедуваат поддршка за Украина.

Според обвинувањата, руската хакерска група позната како „Unit 26165“, а во кибер светот препознатлива и како „Fancy Bear“, води кампања на сајбер-напади веќе повеќе од две години. Земјите потписнички тврдат дека оваа група користи разни тактики, вклучително и испраќање на целни „фишинг“ е-пораки и злоупотреба на украдени лозинки.

Соопштението е потпишано од САД, Велика Британија, Германија, Чешка, Полска, Австралија, Канада, Данска, Естонија, Франција и Холандија. Тие посочуваат дека мета на нападите се владини институции и приватни компании од сектори како што се одбраната, транспортот, поморството и информатичката технологија.

- Advertisement -

Како посебно ранливи држави се наведуваат Чешка, Франција, Германија, Грција, Италија, Молдавија, Холандија, Полска, Романија, Словачка, Бугарија, Украина и САД.

Ова е најновиот чекор на западните сојузници во обидот да се подигне свеста за заканата од руските кибер-операции и да се мобилизира меѓународна поддршка за заштита на критичната инфраструктура во услови на воена поддршка за Украина.