Русија го задржува правото да го отповика ангажманот во договорениот мораториум за напади врз енергетските објекти на Украина, доколку Киев продолжи со слични напади, изјави денеска портпаролот на Кремљ, Дмитриј Песков.
Вашингтон во вторникот објави дека постигнал одделни договори со Украина и Русија за прекин на нападите врз енергетската инфраструктура, надевајќи се дека ова ќе биде почеток за пошироко примирје и мировни преговори.
Сепак, Русија и Украина веќе се обвинија меѓусебно за напад врз гасна мерна станица во руската Курска област, која е клучна за извозот на руски гас кон Европа.
– Русија го задржува правото да не го почитува договорот доколку украинскиот режим продолжи да го прекршува – изјави Песков пред новинарите. Нема смисла ние да се придржуваме до него, а секоја ноќ да се соочуваме со напади врз нашите енергетски објекти – додаде тој.
Сепак, според него, Русија засега ќе остане посветена на договорот.
Кремљ ја обвини Украина дека не го почитува мораториумот, а според Песков, тоа покажува дека украинската армија е вон контрола и не ги слуша наредбите на државното раководство.
Песков додаде дека вооружените националистички сили во Украина добиваат на сила, поради што рускиот претседател Владимир Путин ја спомнал можноста за привремена влада во Киев под меѓународен надзор – идеја што Украина ја нарече „апсурдна и неприфатлива“.
– Путин не го дискутирал ова со американскиот претседател Доналд Трамп – нагласи Песков.
Украинската армија строго се придржува кон договорите со меѓународните партнери и не напаѓа руска енергетска инфраструктура, туку цели исклучиво воени објекти, соопшти Генералштабот на вооружените сили на Украина преку „Фејсбук“, пренесе Укринформ.
Во соопштението се наведува дека руското Министерство за одбрана продолжува да шири дезинформации, обвинувајќи ја Украина за напади врз енергетски капацитети во Русија и на окупираните територии.
„Во исто време, Москва самата ги крши меѓународните договори, напаѓајќи ја украинската енергетска инфраструктура. Само во последните 24 часа, руска артилерија оштети енергетски објекти во Херсонската и Полтавската област“, соопшти Киев.
Украинскиот Генералштаб соопшти дека во врска со ова очекува соодветна реакција од меѓународните партнери на Украина.
