Пофалувајќи ги напорите на САД за решението за Украина, рускиот претседател Владимир Путин во четвртокот го опиша својот состанок на 2 декември со американските преговарачи Стивен Виткоф и Џаред Кушнер како „неопходен и корисен“.
Во интервју за телевизискиот канал „Индија тудеј“, Путин рече дека петчасовниот состанок бил потребен за да се разговара за секоја точка од мировните предлози на американскиот претседател Доналд Трамп.
Според него, планот се базира на договорите од самитот Русија-САД во Алјаска во август.
„Она што го донесоа нашите американски колеги се базираше, на еден или друг начин, на договорите што ги постигнавме за време на мојот состанок со претседателот Трамп во Алјаска. Разговаравме за овие прашања на состанокот во Анкориџ“, рече Путин.
Тој оцени дека Трамп бара консензус за Украина, „но тоа е тешка задача“.
Путин рече дека се согласува со некои точки од планот на Трамп, а не се согласува со други, опишувајќи го процесот како „сложена работа“.
На прашањето дали планот од 28 точки е сè уште важечки, Путин одговори: „Ова се точките што се дискутираат“.
„Тие едноставно ги поделија овие 28, мислам 27 точки, во четири пакети. И предложија да разговараме за овие четири пакети. Но, во основа, ова се исти точки“, објасни тој.
Коментирајќи го ставот на ЕУ, Путин рече дека Европејците треба да се вклучат во процесот на решавање, а не да го попречуваат.
Тој исто така потсети дека на почетокот на конфликтот, Москва предложила Киев да ги повлече украинските сили од Донбас за да избегне воен конфликт, но Украина одлучила поинаку.
„Веднаш им кажавме на Украина, на украинските војници – народот не сака да живее со вас, тие излегоа на референдумот, гласаа за независност, повлечете ги вашите војници и нема да има воени дејствија. Не, тие претпочитаат да се борат. Па, сега се турнаа во ќош“, рече Путин.
Тој тврдеше дека „Русија ќе ги ослободи Донбас и Новорусија или воено или на друг начин“.
„Сè се сведува на ова. Или ќе ги ослободиме овие територии воено или украинските трупи ќе ги напуштат овие територии и ќе престанат да се борат таму“, рече тој.
