Рускиот претседател Владимир Путин во телефонски разговор со турскиот претседател Реџеп Таип Ердоган ја потврди фундаменталната посветеност за пронаоѓање политичко и дипломатско решение за украинскиот конфликт, соопшти прес-службата на Кремљ.
„Путин му се заблагодари на Ердоган за неговата подготвеност да продолжи да ги олеснува директните руско-украински преговори во Истанбул“, се наведува во соопштението.
Двајцата лидери размениле мислења и за актуелните настани на Блискиот Исток и ја истакнаа важноста од брза стабилизација на ситуацијата во Сирија преку дијалог и зајакнување на националната слога.
„Изразувајќи длабока загриженост поради неодамнешниот пораст на насилството во земјата, лидерите ја нагласија важноста од брза стабилизација на ситуацијата преку дијалог и зајакнување на националниот консензус, со почитување на легитимните права на сите членови на мултирелигиозното сириско општество. Двете страни ја нагласија потребата од почитување на суверенитетот, единството и територијалниот интегритет на Сирија“, се истакнува во соопштението.
Ердоган во телефонскиот разговор со Путин ја истакна важноста од почеток на трета рунда директни преговори со Украина и подготвеноста да ги организира во Истанбул, кога ќе се утврдат датуми кои одговараат на двете страни, соопшти кабинетот на турскиот лидер по разговорот.
„Разгледани се билатералните односи меѓу Турција и Русија, регионалните и глобалните прашања. Претседателот Ердоган изјави дека е важно да се почне трета рунда преговори меѓу Русија и Украина и дека Турција ќе продолжи да биде домаќин на преговорите во Истанбул кога ќе се утврдат датуми кои одговараат на страните“, се наведува во соопштението.
Ердоган му рекол на Путин дека Турција сака да обезбеди стабилност во Сирија.
„Претседателот Ердоган рече дека конфликтите по повлекувањето на сириските безбедносни сили од Ас-Сувајда претставуваат закана за целиот регион и оти е важно Израел да не го прекршува суверенитетот на Сирија. Тој рече дека Турција е посветена на обезбедување стабилност и безбедност во Сирија и помагање таа што побрзо да закрепне“, додава официјална Анкара.
