Еван Дандо, некогашна рок-ѕвезда и фронтмен на познатиот бенд The Lemonheads, денес изгледа како бледа сенка на моќната пауер-поп легенда од 90-тите. Неговите обожаватели во Загреб неодамна добија непријатно изненадување – концертот во барот „Винтиџ индустриал“ се претвори во целосно фијаско, а ситуацијата дополнително ја влоши реакцијата на бендот на социјалните мрежи.
The Lemonheads моментално се на европска турнеја која вклучува дури 35 градови. Сепак, настапот во Загреб се покажал како целосен неуспех. Публиката беше сведок на хаос на сцената – Дандо се пожали на звучниот систем уште од првите песни, а по само половина час не многу добро координиран настап, ги фрли клавијатурите и ја напушти сцената.
Многу обожаватели го споделија своето разочарување на социјалните мрежи, а домашните портали потврдија дека концертот бил вистински музички бродолом.
Само два дена подоцна, бендот свирел во Париз. Според рецензијата на францускиот портал Benzinemag, концертот бил некако подобар, но далеку од задоволителен. Дандо удирал по микрофонот, едвај ги следел текстовите напишани на хартија, а настапот траел нешто помалку од еден час – бил прекинат поради ограничен простор, пишува TPortal.
Сепак, Дандо објави снимка од Париз на официјалната Фејсбук страница на бендот со пораката:
– Долги возења, делење автобус со 10 луѓе. Понекогаш свириме шест концерти одеднаш. Лимонхедсите даваат сè од себе секоја вечер. Не е секогаш лесно, но Еван го сака тоа и е роден за тоа. Им благодарам на Џон, Фарли и целата екипа што се толку солидни. Уште пет концерти од 35.
Оваа објава предизвика лавина од гнев. Обожавателите на бендот од различни градови, од Даблин до Варшава, ги споделија своите негативни искуства, а особено се издвои коментарот од еден посетител од Загреб, кој напиша: „Освен распаѓањето во Загреб“.
Наместо извинување, официјалната веб-страница на бендот одговори со шокантен обид за хумор:
– Беше одлично! Ако не ти се допадна, провери се кај твојот проктолог.
Ваквиот потег дополнително ги налути обожавателите и уште еднаш ја потврди тажната вистина – ѕвездата од крајот на минатиот век што некогаш беше Еван Дандо, очигледно исчезнува. По вакви настапи, тешко е да се поверува дека The Lemonheads повторно ќе бидат добредојдени на многу европски сцени.
