Македонските граѓани кои патуваат во странство, особено во држави членки на Европската Унија, треба да бидат особено внимателни и секогаш да проверуваат дали при влез во земјата во која патуваат им е ставен соодветен печат во пасошот.
Оваа „ситница“ може да ви донесе казна до 1.200 евра, забрана за влез до 4 години и непријатности кои ќе ги паметите цел живот.
Иако многумина сметаат дека контролата на границата е одговорност на граничните службеници, реалноста е дека доколку печатот недостига, одговорноста паѓа врз патникот.
За тоа сведочи и непријатното искуство на едно семејство од Србија, кое се враќало од летување во Грција.
– На 21 јули 2025 година патувавме од Србија преку Бугарија за Грција. При влезот во Бугарија, на два од шест пасоши не им беа ставени печати од страна на бугарските граничари. Кога се враќавме, на граничниот премин Евзони, грчката полиција забележа дека ниту во системот, ниту во пасошите нема запис дека тие две лица, едно возрасно и едно дете, воопшто влегле во ЕУ. Објаснивме дека сме патувале заедно и дека грешката е на бугарската страна, но тоа не помогна. Казната беше 1.200 евра, а ако не платевме, четири години забрана за влез – раскажува таткото на семејството.
Тој предупредува дека секој патник треба да се увери дека пасошот му е уредно заверен на секој премин, без разлика дали патува со автомобил, автобус или со авион.
Според експертите за патна документација, недостигот на печат може да се толкува како нелегален влез во државата. Во такви случаи, граничната полиција има законско право да изрече високи парични казни и долгорочни забрани за влез.
Затоа, советот до сите патници е јасен: по секое минување на граничен премин, проверете дали во пасошот имате печат за влез или за излез. Малата внимателност може да ви заштеди голема непријатност, пари и да ви го спаси одморот.
