Промоција на нов хумористичен роман од Кацаров во „Матица македонска“

Во рамките на манифестацијата „Книга во секој дом“, утре, во книжарницата на „Матица македонска“ на Булеварот на книгите „Св. Климент Охридски“, со почеток во 12 часот ќе се одржи промоција на новиот хумористичен роман на Трајче Кацаров „Романот за Чарли Офтика – Туркачот“. Роман во кој комичните ситуации, градени преку ликовите предадени на емпатијата, љубовта, љубомората, зависта, се нижат како на филмска лента, веродостојно и нужно, притоа правејќи ја содржината лесно читлива, односно, лесно видлива.

Новото дело на Кацаров, всушност е роман за киното. За киното како празник што го следи современиот човек. Киното како инкубатор на емотивни стерсови и реакции најчесто изрзени низ извици:„ Аууу! Уааа! Ејјјј! Бреее! Тууу! Пу јазк!“ Но, и антологија на случките во киното и надвор од него приредена од протагонистите во „Романот за Чарли Офтика – Туркачот’ на туѓи терети и сопствени заблуди и адвокатот, докторот по правни науки Алексеј Миро. Роман што ви овозможува читајќи да гледате, а гледаното да го видите. „Поради големата застапеност на хумор во него, романот е забранет за оние што не знаат да се смеат, но и за оние што се смеаат до зајдување. Ако го набавите денес, смеењето ќе ви почне од вчера!“ – стои во најавата на промоцијата, на која читателите ќе можат и да поразговараат со Кацаров.

Со традиционалната манифестација „Книга во секој дом“, и овојпат, преку средби со автори и промоции на книги, „Матица македонска“, остварувајќи ја својата мисија, вниманието го насочува кон македонските автори. Истовремено, со цел навистина книгата да е во секој македонски дом, до 15 мај, над 300 наслови, во книжарниците на „Матица македонска“ и на веб-страницата се со попуст до 70 проценти.

- Advertisement -

Во текот на следната недела, со програмата на манифестацијата се планирани неколку големи настани и авторски гостувања, а вратите на книжарниците на „Матица македонска“ се ширум отворени за читателите, со изборот на книги со намалени цени до 15 мај.