Прекинот на интернетот во Северна Кореја траеше неколку часа, поради што и официјалните веб-страници на институциите и медиумите исто така паднаа.
Не е јасно што го предизвика големиот прекин, но можно е да станува збор за внатрешен проблем, а не за сајбер напад, бидејќи врските преку Кина и Русија беа погодени, изјавија истражувачите кои ја следат интернет и технолошката инфраструктура на Северна Кореја.
Главните официјални медиуми, Министерството за надворешни работи и националната авиокомпанија Ер Корјо беа меѓу веб-страниците кои денес беа паднати, пред полека да се вратат во функција, според Ројтерс. Целата интернет инфраструктура на Северна Кореја не се прикажуваше на системите што можат да ја следат интернет активноста, а беа погодени и е-пошта услугите, изјави претходно Џунаде Али, истражувач со седиште во Велика Британија кој го следи интернетот на Северна Кореја.
„Тешко е да се каже дали ова е намерно или случајно – но се чини дека е внатрешен, а не напад“, додаде тој.
Службениците во Центарот за одговор на сајбер тероризам на Јужна Кореја, полициската дивизија што ги следи сајбер активностите на Северна Кореја, не беа достапни за коментар.
Северна Кореја има еден од најстрого контролираните интернет системи во светот, вклучувајќи пристап до каква било форма на онлајн комуникација. Јавноста има пристап само до интранет поставен од владата, кој не е поврзан со пошироката глобална мрежа.
На малку членови на владата и раководството им е дозволен отворен пристап до интернет, а владините веб-страници и новинските портали честопати служат како пропаганда за странски земји.
Во претходните години, Северна Кореја доживеа големи прекини на интернет, за кои се сомнева дека се предизвикани од сајбер напади.
