Пратениците во грчкиот Парламент вечерва ќе одлучуваат по барањето на четирите опозициски партии за гласање недоверба на Владата поради железничката несреќа кај Темпи, додека низ цела Грција се закажани нови протести, јави дописничката на МИА од Атина.
Гласањето е на крајот од тридневната расправа што започна во средата, а засега не се очекува предлогот да биде изгласан, со оглед на тоа што пратеничката група на владејачката Нова демократија има мнозинство од 156 пратеници, од вкупно 300 во Парламентот.
Иницијативата е на ПАСОК, со поддршка од СИРИЗА, Нова левица и на Курс на слобода, а барањето, што е потпишано од 85 пратеници, се фокусира на железничката несреќа кај Темпи и на безбедноста на транспортот, но се осврнува и на владеењето на правото, скандалот со прислушувањата и на поскапувањата на цените.
На гласањето, што се очекува да биде околу 21 часот, ќе му претходат говори на лидерите на сите политички партии, како и на грчкиот премиер.
Паралелно со расправата, закажани се и низа протести.
Точно напладне, учениците и студентите ќе одржат протести во Атина и во други грчки градови, а демонстрации ќе има и вечерва, во исто време со гласањето.
Во 19 часот пред Парламентот во центарот на Атина, разни организации, здруженија, работнички центри, синдикати и студентски здруженија ќе одржат нов протест, паралелно со расправата на пратениците и со гласањето по предлогот за недоверба на Владата.
Протест имаше и во средата, на првиот ден од расправата во Парламентот, а по завршувањето на официјалниот дел се случија сериозни инциденти меѓу групи маскирани лица и полицијата.
Граѓаните, преку протестите имаат за цел уште еднаш да испратат порака дека бараат правда за железничката несреќа и за да бидат виновниците казнети.
Железничката несреќа кај Темпи се случи на 28 февруари 2023 година во директен судир на патнички и на товарен воз, при што загинаа 57 лица.
